Kloi ka sorkar ban iakren iasuk bad ka HNLC, iaid shakhmat ka survey phiah pud Assam Meghalaya: Governor Phagu Chauhan

Syllad | The Rising MeghalayaFebruary 16, 2024

U Lat ka jylla u Phagu Chauhan haka 16 tarik Rymphang sa shisien pat ula ban biang ba ka sorkar ka kloi ban ïakren iasuk bad ka kynhun kieng atiar Hynniewtrep National Liberation Council (HNLC) katkum ka riti synshar ka ri India bad hapoh ki kyndon jong ka tnad kam poh īing ka sorkar pdeng.

Ha ka jingkren ha ka sngi sdang ïa ka Dorbar Mang Tyngka, u Chauhan u la ong ba ka sorkar kala kut jingmut ban wanrah iaka shongsuk shongsaiñ kaba shirta ha Jylla.

“Ka long kaba donkam ban pynneh ka shongsuk shongsaiñ ha ka jylla ban pynthikna halor ka jingkiew bad ka bit ka biang jong ki paid nongshong shnong ka jylla,” La ong u Lat bad bynrap ba ka jinglong jingman ha kaba iadei bad ka suk ka sain, ka Jylla kalong kaba jai jai bha ha u snem ba la dep”.

Ha kaba īadei pat halor ka jingpynbeit pud hapdeng ka jylla Meghalaya bad Assam, u Lat u lah pyntip ruh ba hadien ka jingïasoi soskular ha u snem 2022 ha ki hynriew tylli ki jaka ba don haka jingiakhajia pud, la sdang iaka sorjamin iaki jaka ban phiah iaki pud ha kine ki jylla.

U Myntri Rangbah ka jylla Meghalaya bad Assam kila dep iakynduh biang ha u Jymmang jong u snem 2023 ban ïakren pynbeit noh ka jingkajia pud kiba dang sah sa 6 jaka.

Ki Regional Committee ruh kila dep ban shong jingïalang bad ka ka jingiakren pynbeit pud bad ka Assam kalong haka lynti kaba dei, la ong u Lat.

Shuh shuh u Lat ula pyntip ka tnad pulit jong ka Home (Police) kala pynkhlain iaki jingtei bad ki iingsah ki pulit, nalor ba nang pynkhlaiñ ïa ka tnad Fire Emergency Service

U la ong ba ka kam ba sahteng halor ka jingpynrung kam ïa ki 1,010 la lah ban pyndep ha u snem bala dep. Ula ong ruh ba ki don baroh 3,000 tylli ki kam ba lait ha ki kyrdan bapher bapher jong ka tnad pulit ka jylla bad kane ruh yn pyndep noh shen.