Kloi ka Sorkar ban iakren bad ki kynhun ba pyrshah ia ka ‘land bank’ ban kyntiew ia ka seng kam

Syllad | The Rising MeghalayaJanuary 24, 2025

U Myntri Rangbah ka Jylla u Conrad K Sangma u la ong ba ka sorkar jong u ka long kaba kloi ban iakren bad ki kynhun bapher bapher kiba sngewkhia halor ka ria jong ka sorkar ban thied bad pyniaid jaka (land bank) na ka bynta ban kyntiew ia ki jingseng kam ba kongsan hapoh Meghalaya.

Haba pynpaw halor ka jingdawa jong ki sengbhalang ban pynsangeh ia ka jingthmu thied bad pyniaid jaka, u CM u la ong, “Ngi long kiba kloi ban iakren bad ki, hynrei ngam ong ba ngan sa buh ia ka tarik kaba ngan sa kho ia ki, em.”

“Ngim dei ka sorkar ka ban ong em, ngi la dep rai ngin iaid shakhmat, ngin ym iakren shuh iano iano ruh, em. Ngi long kiba kloi ban iakren iano iano kiba kwah ban iakren. Kino kino kiba don ka jingsngewkhia sngewbha wan shakhmat, ngi long kiba kloi ban batai,” u la bynrap. 

Da kaba pynpaw ia ka jingkongsan ban sngewthuh ia ki arbynta halor kane ka phang, u Conrad u la ong, “Kaba nyngkong ia ki land bank la pyntreikam ruh ha ki snem kiba la leit noh, kam dei kaba thymmai kaba ngi leh. Ki sorkar kiba la leit noh ruh ki la leh ia kan abd ngi shu pynbteng ia ka. Kaba ar ka long na ka bynta ka jingkiew jong ka roi ka par bad ka jingpynmih ia ki kam ki jam, ki land bank ki dei kiba kongsan, kumta khlem ki land bank ngin ym iohi ia ka jingkiew ha ka roi ka par kaba ngi donkam. Ban pyniabiang ia baroh ki artylli ki bynta ka long kaba kongsan bad ngin pynthikna ba ngin pynbiang tarajur ia ki jingpynsngew jong ki paidbah hynrei ban khmih ruh halor ka rai ka par jong ka jylla.”

U CM u la ban jur ruh ba ki land bank ki dei kiba kongsan bad ong, “Namar khlem ki land bank kumno ngin kiew.Kumta, ka sorkar ka hap ban thied ia ki jaka. Hadien ba ka la dep thied jaka ngin sa iasoi ia ka jingmynjur na ka bynta ka jingai wai kaba jlan sha ki nongsen ia ki kam ba kongsan kiba wan shakhmat.”

“Mynta ka jingkylli ka long ban thaw ia ki lad ha ka liang ka ioh kam ioh jam na ka bynta jong ngi. Kum ka sorkar jylla lada phi phah sha ka jingthaw ia ki lad ioh kam ioh jam, lada phi phai sha ka jingkiew ka ioh ka kot kan ym jia sata khlem ka jingwan bei tyngka da ki kynhun shimet. Kumta khnang ban pynsuk ia ki kam ki jam na ka bynta ki nongwan sengkam ngi donkam ia ki land bank, ngi donkam ban pynsuk ia ki kam ban wan seng ha ka jylla jong ngi,” u la ong.

“Ki lah ban don ki jingsngewkhia bad ngi long kiba kloi ban iakren bad leh ei ei halor kine ki jingsngewkhia hynrei haba phai sha ka nongrim treikam ki land bank kumba nga ong ki dei kiba la dep jia naduh ki snem kiba la leit noh. Ha ki snem kiba la leit ki don bun ki sorkar ki la wanrah ia ka land bank bad namar kine ki land bank mynta ngi la ioh ia ka jingkiew bha ha ka ioh ka kot,” bynrap u Conrad.