Kitbok kitrwiang ka tnad sports iaki ‘thei ialehkai ka Saiden Secondary School ki ban shimbynta haka Subroto Cup ha New Delhi

Syllad | The Rising MeghalayaSeptember 15, 2023

Ki khynnah ialehkai football kynthei ka jylla Meghalaya kin leit ban iashim bynta ha ka “Subroto Cup Football Tournament 2023” ka ban long ha ka nongbah New Delhi naduh ka 19 haduh ka 26 tarik mynta u bnai, ha kaba ka Saiden Secondary School Nongpoh ka nongjop ha ka “State Level Subroto Mukherjee Cup Football Tournament 2023” kan mihkhmat ia ka jylla ha ka U-17 jong ki kynthei.

Na ka liang ka Tnat Sports ka sorkar jylla haka sngi Palei ka la pynlong ruh ia ka jingialang leh burom na ka bynta kane ka jingleit jong kane kynhun U-17 ki kynthei na ka skul Saiden Secondary School, Nongpoh ha madan ialehkai football ha MFA ha Shillong.

Ha kane ka prokram la ia don lang ruh ka Kong Isawanda Laloo, IAS  Director Sports & Youth Affairs ka sorkar jylla kum ka Kongsan ha ryngkat ka jingiadon lang u Bah PB War Nongbri Assistant Director Sports & Youth Affairs ka sorkar jylla,  District Sports Officer ka Ribhoi District, Headmaster jong ka Saiden Secondary School Nongpoh, ki nonghikai bad kiwei kiwei.

Ha kane ka jingialang ba la pyniaid da u Ma K Passah Assistant Director Sports & Youth Affairs ka sorkar jylla la ioh ruh ka jingkren lyngkot na u Bah BL Nongbet DSO Ribhoi District bad ruh ki kyntien pynshlur bad ai mynsiem ia kane ka kynhun ialehkai na ka Kongsan.

Ki dkhot jong kane ka kynhun ba la shah jied ban leit iashim bynta na ka skul Saiden Secondary School sha katei ka Subroto Cup ki kynthup ia ka Daphishisha Syngkli, Ellen Kynta, Imaia Shylla, Kynjailin Sohtun, Juliana Syiemlieh, Alisha Lyngdoh, Inri- La- I- Dor Kongthaw, Batiplang Khapiah, Eiladki Ksoo, Yulity T. Phanrang, Danisha Lyngdoh, Shimtilang Thongni, Nibari Maring, Barikor Kurbah, Daiamon Makhroh, Unity Maring, Ridahunlin Lyndem-Manager bad Sumarlang Swer Coach.