Kitbok kitrwiang iaki nongialehkai West Jaintia Hills ki ban iashimbynta ha ka Meghalaya Games
Ka synjuk ialehkai ka District kynthup naduh ka West Jaintia District Sports Association, ka West Jaintia District Badminton Association, West Jaintia Hills District Cycling & Adventure Association bad kiwei kiwei ki synjuk ki la lumlang iaki rang bad thei ialehkai shwa ba kin mih napoh ka District ban shim bynta haka lympung ialehkai baheh ka Jylla ka 5th Meghalaya Games 2024.
Kane ka lympung ialehkai ba heh ka jylla kan sdang haka 15 tarik haduh 20 tarik Kyllalyngkot ha nongbah Tura, West Garo Hills District.
Iaka Send Off Ceremony la pynlong hapoh Indoor Hall Stadium, kaba la pyniaid da u Chiefs de Mission jong ka West Jaintia District u Bah Patrick Lamare ha ka jingdonlang u Deputy Commissioner ka West Jaintia u Bah BS Sohliya, ki nongpyniaid, ki kmie ki kpa jong ki rang bad ki thei nalor kiwei kiwei.
U Deputy Commissioner u Bah BS Sohliya IAS haka jingkren ula kyrkhu kyrdoh bad kitbok kitrwiang ia baroh ki rang bad thei ialehkai hashwa ba ki kin mih napoh ka district.
Ula kyntu ban long kiba tip iaka akor ka burom khamtam sha shnong nongwei bad la kyrpad ba ynda la poi sha Tura ym dei ban peit iaki jingduna hangne hangtai bad lada don kino kino ki jingeh jingduna pyntip sha nongialam iaka kynhun khnang ba kin leh ia kaba donkam.
Ula kyntu ruh iaki ki rang bad ki thei ialehkai ban trei shitom bad ialehkai bha bad ban khur shibun ki takma na ka bynta ka District.
Baroh ki rang bad thei ialehkai ka District kumjuh ki Coach bad Manager ki don 216 ngut kynthup 117 ngut dei ki shynrang, 72 ngut dei ki kynthei bad 27 ngut ki Caoch bad Manager.
Ki rang bad thei ialehkai ka district kin shim bynta haki 16 tylli ki jait jingialehkai kynthup naduh ka Football, Athletic, Basketball, Archery, Volleyball, Karate, Judo, Taekwondo, Wushu, Boxing, Cycling, Arm Wrestling, Badminton, Mawpoin, Wapong Sika bad Rah Moo Khrah.
Facebook
Instagram
Youtube
Twitter
Leave a Reply