Kitbok ka KSU-EJH ia u player ban mihkhmat haka 33rd Natl Sub Junior Classic and Equipped Bench Press C’ship

Syllad | The Rising MeghalayaOctober 13, 2024

Ka Khasi Students’ Union (KSU), East Jaintia Hills District Unit ha ka 12 tarik u Risaw kala leit iakynduh ia u Fabregas Lyngdoh u player ialehkai rah nar (powerlifting) ban kitbok kitrwiang ia u ha shwa ba un leit iashim bynta sha ka jingiakob “33rd National Sub Junior Classic and Equipped Bench Press Championship.”

Kane ka championship kan long ha Magoan, Goa naduh ka 14 haduh ka 18 tarik u  Risaw ia kaba la khot pynlong da ka Powerlifting India.

Ka KSU haka jingialam u president samla Streamly S Suchen, finance secretary samla Shaniahskhem Dkhar ryngkat ka jingsynran lang da u assistant finance secretary u samla Deiniwan Lyngdo, organising secretary samla Donbok Mukhim bad kiwei kiwei kila synniang da ka pisa katba ki ioh ei ban ai mynsiem bad pyneh rngiew ia u Fabregas.

Kum ban shu pynkynmaw ba u Fabregas Lyngdoh uba na ka shnong Rymbai, East Jaintia Hills ula iashim bynta ha ka Meghalaya Games 2023 ha Tura bad kumjuh ruh ha ki jingiakob bapher bapher Jong ka District level bad ka State level.

Na ka liang ka KSU ka pynpaw ka jingkmen kaba khraw ban iohi ba ki khun samla na ka Bri Hynniewtrep ki la sdang paw ha ki kam ialehkai bapher bapher da ka jingkyrshan hi da kiba haiing ha sem bad ki paralok parajor.

Ha kajuh ka por ka KSU ka la buh jingkylli da kaba ong shaei ka lawei ki khun samla kiba don ka sap ka phong kan poi lada ka Sorkar kam phaikhmat ban aijingkyrshan lem khnang ba kin lah ban kiew shaphrang bad khnang ba kin lah ban wanrah ia ka nam ka burom ia ka jylla bad ka Ri hi baroh kawei.