Kiew ka jingnang thoh nang tar ha ka shnong Mihmyntdu, 104 ngut kiba pep skul kila bteng biang iaka jingpule ong ka Kong Tina Lakiang

Syllad | The Rising MeghalayaSeptember 9, 2023

Ka Head Teacher jong ka R.C. Eve. Secondary School Mihmyntdu, Tina Lakiang kala ong ba haduh 104 ngut ki khynnah kiba la pep skul kila bteng biang iaka jingpule ha kane ka skul bad kine kilong nuksa kaba kiwei ki khynnah bad ki kmie ki kpa kin bud ban nang haka thoh ka tar.

Ia kane ka kong Tina kala ong haba rakhe iaka sngi nang thoh nang tar ne ka World Literacy Day kaba prorkam kaba la pynlong da RC Eve Secondary School haka sngi Thohdieng.

Ka mat pdeng jong kane ka sngi kyrpang mynta ka kynti ka dei ‘‘Promoting Literacy for a World in transition, building the foundation for sustainable and peace societies’ ne ka jingkyntiew ia ka pule puthi ha satlak ka pyrthei ban seng iaka nongrim kaba skhem ban ioh iaka imlang sahlang kaba suk.

Iaka jingialang la pyniaid da ka Kong Baiahunlang Phawa Assistant Teacher haka jingdonlang ka Head Teacher ka Kong Tina Lakiang, ki dkhot ka Manging Committee, ki nonghikai bad ki khynnah kane ka skul.

Ka Kong Tina Lakiang haba kren shuh shuh kala ong ba naduh bala sdang iaka R.C. Eve. Secondary School la sdang ha u snem 2004 ryngkat ka thong ban ai jinghikai iaki khynnah ki bym ju leit skul bad ruh ia kito ki khynnah kiba la pep shiteng por ban khring ïaki ba kin wan ha kane ka skul na ka bynta ba ki ïoh ïa ka jingnang jingstad bad ruh kin lait na ka jingim lyngkar.

Ka la iathuh ha ka por ba sdang ia kane ka skul, la don tang 45 ngut ki khynnah skul bad kiba nang thoh nang tar ha ka shnong Mihmyntdu ka long tang 40%, hynrei sngewsarong pat ba mynta kiba nang thoh nang tar kala kiew shaka 95%.

Haka sien kaba nyngkong ithuh ka Dorbar Shnong Mihmyntdu iaki khynnah bad samla pule ba pass bha

Ka Kong Lakiang kala pynpaw ruh ka jingsngewnguh iaka ophis District Mission Coordinator, SSA-SEMAM West Jaintia Hills kaba la iarap bad long shisha ka jingkyrkhu iaki khynnah bad ka dap ruh da ka jingsngewnguh iaka jingtrei shitom jong ki nonghikai naduh ki nonghikai step haduh ki nonghikai sngi.

Ka Kong Jessie Biam, Assistant Teacher haba batai bniah halor ka phang, ka la ong ngi im haka juk stad khlem ka jingnang jingstad ngin ym lah ban leh eiei. Ka la ong ruh, ka jingstad kadei ka iktiar kaba lah ban weng iaka jingduk jingkyrduh kumta kala kyntu iaki khynnah ban trei shitom ban pynduh jait iaka jingdon ki khynnah ki bym nang ban thoh ban pule.

Ka la ong ka West Jaintia, ka la kiew shaduh ka 63% ha ka liang ka jingnang jingstad, namarkata ka la kyntu ia ki khynnah ban trei shitom bad minot thop ha ki jingpule, khnang ba ka pule puthi kan nangkiew ym tang hapoh ka District, hynrei haka jylla hi baroh kawei.

Ban pynshlur iaki khynnah skul kane ka skul kala pynlong ruh iaki jingiakop bapher bapher ba kynthup ka Drawing-painting, Recitation, thoh Poitri bad kiwei kiwei.