Kiew ka jingiap sha ka 10 ngut kynthup 7 ngut naka juh ka longiing ba lynshop ki bor mariang iaka Rilum Garo

Syllad | The Rising MeghalayaOctober 5, 2024

Haduh 10 ngut ki briew kynthup ia hynniew ngut ki dkhot kawei ka longiing ki la duh ei la ka jingim na ka jingshah lynshop ha ki bor ka mariang ha Rilum Garo.

Ka jingther ‘lapbah ba khlem sangeh ka la wanrah ruh ia ki jingjia twa khyndew bad ki jingshlei um ba shyrkhei bad kaba la pynjulor ruh ia kiba bun ki jingkieng bad ki iing ki sem. 

Kine ki hynniew ngut ki dkhot ka longiing kaba kynthup ia i khunlung iba dang shi snem ki la duh ei ia la ka jingim hadien ba ka iing kaba ki shong ki sah ka la shah tep na ka jingtwa khyndew ha ka shnong Atisia Songmong, South Garo Hills District ha ka 4 tarik Risaw.

Kine ki lanot kiba la khla noh ha kane ka jingjia ba sngewsih ki dei kiba la tip kyrteng kum ka Silji R. Marak (60 ), ka khun jong ka, ka Merina R. Marak (39), u pyrsa u Sama N. Sangma (50), ka khun ksiew ka Chengbe R. Marak (22), u khun u Desrang R. Marak (14), khun ksiew ka Silbera R. Marak (8), u khun ksiew jong u khun u Dimse R. Marak (uba dang 1.5) snem rta.

Lai ngut ki briew kila duh noh iala ka jingim ha ka thain Dalu ha West Garo Hills na kane ka jingjia shah lynshop mariang kaba la jia ha ka sngi Thohdieng ba la lah.

Ka jingther u ‘lapbah ha ryngkat ka jingshlei um bad ki jingtwa khyndew ki la ktah jur ia ki laitylli ki district jong ka West Garo Hills, South West Garo Hills bad South Garo Hills.

Ha kine ki jingjia ki la don haduh palat 10 tylli ki iing ki sem kiba la shah pynjulor katba haduh 54 tylli ki shnong bad palat 4,954 ngut ki nongshong shnong ki la shah ktah jur.

Na ka liang u Myntri Rangbah ka Jylla u Conrad K Sangma ula bthah ia ki bor District ba kin shimkhia ha kaba iadei bad kine ki jingjia bad ban pynkloi ia ki lad jingiarap sha kito ki jaka kiba shah ktah.