Kiew 2 ngut ka jingiap ki khynnah skul ka Jylla ha Karnataka ba bam jingbam ba sniew

Syllad | The Rising MeghalayaMarch 18, 2025

Sa uwei pat u khynnah skul na ka jylla Meghalaya u la khlad namar ka jingshitom jur na kaba bam ia ka jingbam ba sniew (food poisoning) hapoh kawei ka hostel ba la pyniaid beain da ka skul shimet ha Malavalli, Karnataka.

Ka khubor ka iathuh ba une uwei pat u khynnah uba la khlad noh u dei na ka thain Nongstoin ia uba la tip kyrteng kum u Namebantei Marwein 12 snem rta bad uba dang pule ha ka klas VII.

Ki don haduh 23 ngut ki khynnah skul kiba dei na Meghalaya kiba sah ha kane ka hostel bad kiba la ngat ha ka jingshitom na kaba bam ia ka jingbam kaba tam ba la ai na ka jinglehniam Holi. Kumba kalong mynta kiwei pat kiba don hapdeng ka jingshah sumar hapoh ka hospital ki la  lait na ka jingma bad ba ka jingkhmih bniah ka dang iai bteng.

Na ka liang ki ophisar ka Tnad pule puthi ka Jylla ki la wan poi ha kane ka jaka ba la jia kane ka jingjia ba sngewsih ha Mandya district ka Karnataka bad bishar bniah halor ka jinglong jingman baroh.

Kane ka kynhun ka la iakynduh ruh ia u District Magistrate ka Mandya District bad leit jngoh ruh shapoh ka hospital ha kaba la sumar ia kine ki khynnah skul na Meghalaya.

Nalor kata ki la leit jurip ruh ia ka hostel jong ka skul ha kaba kane ka jingjia ka la jia bad iakynduh ia baroh kiba don bynta.Kane ka kynhun kan aiti ruh ia ka kaiphod halor ki jingshem ki jong ka sha ka Tnad pule puthi.

U Commissioner & Secretary, Home (Police) Department u Bah Cyril Diengdoh  ruh u la wan poi ha kane ka jaka ha ka jingsynran lang da ki bor pyniaid District bad ki heh pulit.

U District Magistrate u Dr Kumar u la pyntip ha u bad ka jingtohkit jong ki pulit ka dang iaid shakhmat ha kaba la kem ruh ia lai ngut ki briew kaba kynthup ia u trai jong ka skul bad u nongtrei jong ka hostel.

Na ka liang u Senior Medical Officer jong ka Hospital ruh u la ia don lang ban pynpaw ha u ha kaba iadei bad ka jinglong jingman jong ki khynnah skul na Meghalaya.