Ki trai trok ki dawa pynkiew bai kit cement, ka JYF dawa pynioh cement

Syllad | The Rising MeghalayaDecember 10, 2021

Katba ka jingiakhih jong ka Jaintia Hills Truck Owners’ Association (JHTOA) ka dang iaid shakhmat ban dawa pyntreikam iaka bai kit bai bah thymmai kaba la pynbna da ka sorkar Jylla naduh mynshem snem, ka Jaintia Youth Federation (JYF) kala thoh sha u Myntri ba dei peit iaki karkhana ban tuklar halor ka jingbym don cement shuh ha West Jaiintia Hills District.

Ka JYF kala ai da ka jingthoh lyngba u Deputy Commissioner, West Jaintia Hills District sha u ma Sniawbhalang Dhar ban iathuh iaka jingeh ba ki paidbah nongshong shnong khamtam ki nongdie cement, misteri kiba trei bylla ban tei jingtei kiba shah ktah na ka jingiakhih ka JHTOA.

Ka JYF ka kyntu ia u Ma Sniawbhalang ba dei peit ia kane ka kam bad ia ka sorkar MDA, ia ki local MLA ka rilum Jaintia ba kin shim ia ka jingkitkhlieh ban tuklar ban pynbeit kloi ia bai kit bai bah thymmai namar ba don ka indefinite strike ne ka jingiakhih kaba khlem buh por ba la khot da ka seng JHTOA kan wanrah iaka jingduh cement ha district.

Kumban ka sorkar kaba la pynmih iaka jingpynbna naduh u Kyllalyngkot 2020 bad Nailur 2020 kala pynthymmai ïaka dor bai kit mar ki trok kata T.7 haduh T.11 shi kilometre shi ton ha ki surok rong, T.8 haduh T. 12 shi ton shi kilometre haki surok maw bad T. 10 haduh T. 12 shi ton shi kilometre ha ki surok khyndew.

Hynrei namar ba ki karkhana dewbilat kim pyntreikam wat hadien ba ki trai trok kila mynjur bad pdiang iaka dor T.7/- shi metric ton shi kilometre hadien ka jingiakren kaba bun bunsien kala rai ban sdang iaka jingiakhih kaba khlem buh por naduh ka 6 tarik Nohprah.

Dei hadien 4 sngi u DC incharge ka East Jaintia Hills District Bah SS Syiemlieh ula khot jingialang iaki ar liang mamla, kane ka jingialang kam poi shaei shaei bad kin shong biang lashai ka sngi 11 tarik Nohprah.

Kumba long hi ka JHTOA kala pyneh beit triang, katba ka synjuk ki karkhana dewbilat ruh kim shym la ai ksai eiei ban pyntreikam iaka dor kaba la pynbna ka sorkar.