Ki shijur na Indore ki don ha ryngkat bad laingut ki shynrang hashwa ba kin jah rngai

Syllad | The Rising MeghalayaJune 8, 2025

Ha kaba iadei bad ka jingjah rngai jong ki arngut ki shikurim na Indore, Madhya Pradesh ha kaba ia ka metiap jong u shynrang u Raja Raghuvanshi la lapdien na ka jaka riat ba jylliew hajan ka kshaid Weisawdong ha ka 2 tarik Jylliew hynrei ia ka kurim jong u ka Sonam ym pat shym la lapdien haduh mynta.

Na ka liang u tourist guide u la pyntip sha ki pulit ba u la iohi khatduh eh ia kine ki shijur ha ryngkat laingut kiwei pat ki shynrang ha ka sngi ba kin sa jah rngai noh.

U Bah Albert Pde uba dei uwei na ki guide ha ka shnong Mawlakhiat haka sngi Saitjain u la iathuh ba u la iakynduh ia kine ki shijur, kata u Raj Raghuvanshi bad ka kurim jong u ka Sonam kiba don ryngkat bad laingut ki shynrang katba ki dang don ha ka lynti hadien ba ki la wanphai na ka jingkieng jri (Double Decker Root bridge) na Nongriat.

U la ong ba kine baroh sawngut ki la iakren da ka ktien Hindi katba ka Sonam ka dang iaid kham nadien jong ki.

U Albert u la pyntip ruh ba u la tyrwa na ka bynta ban iarap lem ia kine ki shijur lyngba ka kam aijingshakri jong u ha ka 22 tarik Jymmang, hynrei ki la kyntait.

Hynrei kine ki shijur hadien ki la shim ia ka jingshakri lyngba u Bah Bha Wansai ban ialam ia ki sha Nongrait ha kaba ki la pynlut ia ka miet hapoh Shipara Homestay hashwa ba kin wanphai ha ka step kaba bud khlem u nongbtin lynti.

“Ki la kyntait ia ka jingtyrwa aijingshakri jong nga ha ka por ba ki la wanphai,” u la ong da kaba bynrap ba ha ka por ba u la poi ha Mawlakhiat, ka scooty jong ki kam shym la don shuh ha katei ka jaka,” u la ong.

Lah ban kdew ba kine ki shikurim kiba dang shu pyndep ia ka jingiathoh shongkurim ki la wan shangkai sngewbha sha ka thain Sohra hadien ba ki la jah rngai noh naduh ka 23 tarik Jymmang ha kaba ia ka scooty ba shu wai jong ki la lapdien na Sohrarim, kata kumba katto katne kilomitar ka jingjngai na ka parking lot ha Mawlakhiat ha ryngkat u shabi uba don hapoh jong ka.

Na ka liang ki kynhun kiba iashim bynta ha ka jingwad haduh mynta kim pat shym la lapdien satia ia ka Sonam hynrei ki la ioh tam ia ka jainjri ne raincoat najan Mawkma, kaba jngai kumba 9.8 Km na Weisawdong ha ka 4 tarik Jylliew bad ka jingtohkit halor kane ka dang iaid shakhmat.