Ki rynsan social media ki iarap ban pynpaw pyrthei ia ki sap ki phong; ong u Myntri tnad Sports

Syllad | The Rising MeghalayaAugust 14, 2024

Kum shi bynta ban sei madan ia ki sap ki phong bapher bapher hapdeng ki khynnah, kata la ka long ha ka phutbol ne kiwei pat ki jait jingïalehkai ha ka pyrthei ka social media mynta ka long kaba donkam bha bad kaba lah ban iarap ban pynpaw pyrthei ia la ki jong ki sap ki phong, ong u Myntri ka tnad Sports ka Sorkar Jylla u Bah Shakliar Wajri.

Haba kren sha ki lad pathai khubor hadien ka jingai khublei kitbok kitrwiang ia u heprit Samborlang Rynjah, 7 snem ka rta ha ka 13 tarik Nailar shwa ba un mih na Shillong ban leit shah hikai ha ka Minerva Football Academy ha Punjab, u bah Shakliar u la ong ba ka rynsan social media ka iarap bha lada nang ban pyndonkam ïa ka.

Kum ban shu kdew u heprit Samborlang u la paw pyrthei bha ha ki bnai kiba la dep na ka video kaba pyni ia ka jingtbit ap kol jong u bad la pyniasyriem ia u kum u Emiliano Martinez, u rangapkol ka Ri Argentina kaba la rah ia nam lahduh jong ka lympung ïalehkai phutbol World Cup 2022.

Kane ka video ka la khring ia ki club na shabar Jylla bad bar ri kumjuh bad mynta ka kynti u heprit Samborlang Rynjah u la ioh ban soi ia ka kontrak ba 10 snem bad Minerva Football Academy ha kaba un shah hikai nadong shadong.

“Ngi la don ka jingiakynduh bad ki bahaïing, ki kur, ki hynmen u heprit Samborlang bad ngi sa tip ba kumno u poi sha ka bynta ban ioh iasoi bad ka Club ba pawnam ha ka Ri India”, la ong u Bah Shakliar uba la bynrap ba dei u hynmen jong u heprit Samborlang uba la pynlut por ban ring bad thep ia ki video ap kol jong u para ha ki rynsan social media.

U la kyntu pat ba kiei kiei kiba ia dei bad ka rysan social media ki dei ban long na ka bynta ka jingbha bad jingmyntoi. “Ka tnad Sports ka don ia ka bynta ban kyrshan ia ki heprit bad khynnah don sap”, la bynrap u Myntri.

Shuh shuh u la ong ba ka jingiaid lynti u heprit Samborlang kan long pat ka jingai mynsiem ia kiwei pat ba kin trei minot ban ioh kheit ia u soh bad u long mynta ka jingsngew sarong ia ka Ri Khasi Jaiñtia bad ka Jylla hi baroh kawei.