Ki paidbah ka Rilum Jaintia kin ai ‘Red Card’ ia ka VPP ha ka elekshon MLA  2028: Sniawbhalang

Syllad | The Rising MeghalayaApril 18, 2025

U National General Secretary ka NPP uba dei ruh u Symbud Myntri Rangbah ka Jylla, u Bah Sniawbhalang Dhar ha ka 17 tarik Iaiong u la ong ba ki paidbah ka Rilum Jaintia kin sa ai da ka ‘Red Card’ ia ka Voice of the People Party (VPP) ha ka elekshon MLA 2028.

“Phi tip balei ki (VPP) ki la leit khah khah sha Rilum Jaintia? Ka dei namar ba ki sheptieng ia ki paid Jaintia namar ngi la ai ‘Yellow Card’ ha kane ka elekshon MDC ba la dep bad ngin sa ai syndon ia ki da ka ‘Red Card’ ha u 2028,” ong u Bah Sniawbhalang.

“Ki la jan ioh ‘Yellow Card’ ha Rilum Khasi ruh. Ki la jop na baroh ki 29 seat ha ka elekshon MP hynrei ki la jop pat tang 17 seat ha ka elekshon sha ka KHADC. Ka long kumba ki la ioh ‘Yellow Card’. Namar kane, ki la duh thiah duh dem bad ki la bunkam ha ki jingkren ki bym don nongrim,” u la bynrap.

Kane ka jingkynthoh ka jong u ka la wan long shi sngi hadien ba u President ka VPP u Bah Ardent M Basaiawmoit u la byrthen ban leit sha ka Election Commission of India (ECI) ba kan peitngor bha ia ka Rilum Jaintia hashwa ka elekshon MLA 2028, kata ha ka jingkren paidbah ha Jowai, West Jaintia Hills.

Ha ka shithi ba dang shen jong ka sha u Chief Secretary, ka VPP ka la dawa ban pynlong da ka jingtohkit kaba laitluid halor ka jingkynnoh ba ka sorkar kam shym la lah ban pynlong ia ka elekshon kaba laitluid bad kaba khuid ba suba hapoh JHADC.

Ka VPP ka la jop tang 8 seat ha ka elekshon JHADC katba ka la ioh 17 seat ha KHADC ha kane ka elekshon kaba la long ha u bnai Rymphang ba la dep.

U Bah Sniawbhalang u la kyntu ruh ia ka VPP ba ka dei ban burom ia ka rai ba la ai da u paidbah ha Rilum Jaintia bad ban sangeh ban pyrshang ban hikai skul ia ka ECI ba kumno kan pyniaid ia ka elekshon.

“Da ka jingjop ha ka elekshon JHADC, kam mut ba ka NPP ka la pyndonkam bakla ia ka bor bad kam mut ba ka VPP ka la jop ia ka elekshon ha KHADC namar ba ki la pyndonkam bakla ia ka bor. Kaei kaba kongsan ka long ba ngi dei ba burom ia ka rai jong u paidbah. Ban ong ba ngin leit sha ka ECI, nga sngew ba phi (VPP) phim donkam ban hikai ia ka ECI halor kaei kaba ka dei ban leh bad kaei kaba kam dei ban leh,” u la bynrap.

Nalor kata une u nongialam ka NPP u la shim ruh ia kane ka jingleh jong ka VPP kum ka jingleh kutlad namar ka jingsyier bad ka jingbym sngew shngain.