Ki nongbam khaw NFSA ha West Jaintia Hills ki dei ban pyndep e-KYC noh kloi

Syllad | The Rising MeghalayaApril 3, 2025

Ka ophis jong u Deputy Commissioner (Supply), West Jaintia Hills District, ka pyntip ba baroh ki nongbam khaw ration hapoh Laskein bad Thadlaskein Block ki dei ban pyndep noh ia ka jingpynrung Aadhaar bad e-KYC ha ki Fair Price Shop shwa ka 30 tarik u Jylliew 2025.

Kane ka dei ka jingpyntip ba khatduh na ka Sorkar Pdeng, bad hadien katei ka tarik, kito kiba ym pat pynrung Aadhaar lane leh e-KYC yn sa pynduh noh ia ka jingioh khaw ration jong ki. Baroh ki nongbam khaw kiba ym pat dep ki dei ban pyndep noh kloi ha ki Fair Price Shop kiba hajan tam.

Ka Sub-Divisional Officer (Supply), Amlarem Sub-Division, ka pyntip ruh ba katkum ka hukum na ka Supreme Court jong ka Sorkar India, baroh ki nongbamkhaw NFSA (AAY + PHH) ki hap ban pyndep ia ka e-KYC hapoh ka 30 tarik u Jylliew 2025. Ha kaba iadei bad kane, ki Waheh Shnong ki dei ban pynbna paidbah bad ban pynsngewthuh ia ka jingdonkam jong ka e-KYC sha ki paidbah bad ban pyntikna ba ki pyndep ia kane ka kam hapoh ka por ba la buh.

Katkum ka Section 17 jong ka Meghalaya Food Security Rules 2018, baroh ki nongbam khaw ki dei ban pyndep ia ka e-KYC khnang ban iai bteng ia ka jingmyntoi jong ka skim NFSA. Ki Fair Price Shop Dealers ki dei ban plié ia ka dukan man la ka sngi ban ai lad ia ki paidbah ba kin pyndep noh ia ka e-KYC ha ka por ba biang.