Ki liang pyrshah kim don mon ban rah ia ki mat kiba iadei bad ka bha ka miat ka Jylla; ong u Myntri

Syllad | The Rising MeghalayaMarch 12, 2024

U Myntri sorkar uba dei ruh u nongialam ka NPP u Rakkam A Sangma ha ka 11 tarik mynta u bnai u la ong ba ki party liang pyrshah ki la pulom ban rah ia ki mat kiba iadei na ka bynta ka bha ka miat jong ki paid nongshong shnong ka jylla.

Da kaba ther kylla ia ka jingkynnoh jong ka Seng VPP ba ka sorkar MDA ka la pulom ha kine ki hynriew snem kiba la dep, u Sangma u la ong, “Lada don kino kino ki jingeh lane kino kino ki mat, ki (VPP) ki la dei ban wanrah ia kata hapoh ka iingdorbar thawain. Hynrei ki la mih noh pynban shabar jong ka Dorbar Assembly, kata ha ka por ba u Myntri Rangbah ka Jylla u Conrad K Sangma u dang pynkhreh ban jubab ha ka general discussion jong ka Dorbar Mang tyngka. Ki dkhot ki party liang pyrshah kim shym la wanphai shuh, kata kaba mut ba kim don mon bad ba kim don ia kino kino ki mat ban wanrah hapoh ka Dorbar.”

U la ong ruh, “Ngam tip balei ba kim don ia ka mon. Ki la dei ban rah ia ki mat kiba iadei na ka bynta ka bha ka miat jong u paidbah lada don.Kane ka mut ba ha ka sain hima, kane ka dei ka jingpynpaw shai ba ki don tang khyndiat eh ki mat kiba long pyrshah ia ka sorkar Jylla.”

Nalor kata une u Myntri u la ong ruh ba ka Assembly ka dei ka rynsan kaba biang tam na ka bynta ki MLA ba kin iakren halor ki kam kiba iadei bad ka Jylla bad ym ha ki surok. “Kino kino ki jingpyrta kiba ha surok kin ym lah ban long ain. U la ong ba ia ki rule, ki ain bad ki polisi la shna hapoh ka iingdorbar ym ha ki lynti surok. “Nga tharai man ki nongmihkhmat ki dei ban tip ba ia ki polisi bad ki jingshim rai ha ki ri synshar paidbah kum ha India dei ban iatai, iamir jingmut bad shim rai hapoh ka iingdorbar bad ym ha ki lynti surok,” u la ong shuh shuh.

U la ong shuh shuh, “Nga nang lah khmih lynti ba ki dkhot ki liang pyrshah kin rah ia kiba bun ki mat, hynrei Ngam tip kaei kaba la jia ha kane ka kynti kaba mynta. Kiba bun na ki dkhot ki la pynpaw ia ka jingbym don mon ban iashim bynta ha ki jingiatai, ki jingiamir jingmut bad ki jingshim rai, Nga la iohi tang khyndiat eh ki dkhot ki liang pyrshah bad ki jaka shong ki thylli.”