Ki Home Guard ki dei ki kynhun trei mon sngewbha kim lah ban dawa ban thungkam pura: Comingone

Syllad | The Rising MeghalayaFebruary 26, 2024

U Myntri ka tnat Civil Defence & Home Guards u Bah Comingone Ymbon haka 26 tarik Rymphang, u la pynpaw hapoh ka iingdorbar thawain ba ka jingthung ia ki Home Guards Volunteer ka dei beit da ka mon sngewbha kum ka kynhun Voluntary Organization bad kim lah satia ban kam ne ban dawa na ka bynta ban thungkam pura lane ban pynneh shyrta ha ka kam.

Haba jubab ia ka jingkylli ba wanrah u MLA ka VPP na Nongkrem u Ardent Basaiawmoit, u Myntri ula ong ba ka jingthung kam kaba la neh slem slem ia ki Home Guard Volunteer kam lah satia ban pynneh sah ha ka kam lane ban pynioh ia kino kino ki hok na ka bynta ka jingai jingshakri kaba shipor ne kaba neh bad ki kynhun ne ki agency kiba thung ia ki.

Nalor kata u Ymbon u la ong ruh ba ka tnat Civil Defence & Home Guards ka dei tang ka agency jong ki Home Guard Volunteer ba la pynrung da ki agency bapher bapher bad kiba hap hapoh ki ain ki kyndon kiba ki la buh.

“Ia ki jingkitkhlieh na ka bynta ki jingsiew halor ki jingshakri, kata kum ka tulop bad ki allowance na ka bynta kiba kum kine ki Home Guards Volunteer ka shong beit ha kito ki agency kiba long ki nongai kam na ka bynta jong ki,” ong u Myntri da kaba bynrap ruh ba baroh ki jingtreikam kiba iadei bad  kine ki volunteer, kata kum ka jingpynsangeh kam, ka jingpynneh bad kiwei pat ka shong  pura ha ka jingkhmih jong kito ki agency kiba siew na ka bynta jong ki.

Ha kajuh ka por u Myntri u la ong ba na ka liang ka Tnat ka la pyrshang ban wad ia ki lad ki lynti ban khmih ha kaba iadei bad ki jingeh kiba ki Home Guard ki iakynduh.