Khyrwit ka Umkiang SA 4 kol pyrshah iaka Borsora FC haka football ka ENSA

Syllad | The Rising MeghalayaNovember 11, 2021

Ka Umkiang SA kala khyrwit haduh 4-0 kol pyrshah iaka Borsora FC A haka lympung ïalehkai football kaba pyniaid da ka Elaka Narpuh Sports Association (ENSA) kaba long ha madan ialehkai ka shnong Umkiang haka sngi Balang.

Ha lyndet kane ka namjop ka Umkiang dei ka jinglah ialehkai bha ki nongialehkai ba shakhmat kiba la nion ha baroh kiliang iaka kynhun jong ka Borsora.

Ka Umkiang kala tam lypa ar kol haka kylla step lyngba ka kol kaba la thep da u Ker Pala (29, 46), haka kylla miet kala pynban biang sa ar kol lyngba u MacDonald Bareh (53) bad u Confirm Chadong (56).

Ka Borsora kala pyrshang ban thaw ki lad ki lynti ban ioh pynphai kol, hynrei haduh bala wai ka por iakhun kam shym la ioh ki kabu kiba paka ban pynkylla sha ki kol bad hap ban pdiang ia kane ka namrem da 4 kol.

Haki ar tylli ki jingiakhun, ka Sunapyrdi FC pyrshah iaka Kuliang bad ka Wahiajer Narpuh pyrshah iaka Borsora FC B baroh ar tylli kine ki jingiakhun kila wai da kaba iakhaid khlem don mano mano ba ioh pynkhih jar.