Khynra laisen khaïi ka FKJGP ha Ladrymbai, Dkhiah West, ar taiew ai por ban pynbiang kot biang sla

Syllad | The Rising MeghalayaFebruary 10, 2024

Ka Seng FKJGP-Khliehriat Circle hapoh ka jingialam u president u Michal Chyrmang ryngkat ka jingdon lang ka FKJGP-Jaintia Zone ba la ialam da u Marhok Kynti Marboh Vice President bad ka FKJGP-EJH haka 10 atrik Rymphang ki la pynlong ka jingkhynra laisen khaii ne trading Licence, labour Licence ha ki thain Ladrymbai bad Dkhiah West ha kaba ki la lap ba bun ki dukan bad ki jaka treikam jong ki bar jylla kim don satia ia ki kot ki sla kiba biang.

“Na ka liang ka seng na ka por sha ka por ka la phah da ka jingthoh sha ki bor ba dei khmih ka JHADC ban pynlong ka jingkhynra trading Licence ia ki bar jylla hapoh East Jaintia namar ba kadei ka kamram jong ka Council ban leh hynrei kam shym la leh eiei. Kumta dei halor kane ka jingshim kam jong ka Council ba ngi na ka liang ka seng ngim bamse ban leh hi ia kaba donkam,” ong ki nongialam ka Seng.    

Ka Seng ka la ong ba ha kane ka jingleit khynra ka la lap ba bun ki bar jylla kiba don ia ki trading licence hynrei kham bun hi na ki dukan kim don pat ia ka Labour Licnece, katba ki dukan die tim (Teer counter) pat la shem ba bun ki don ia ki licence. Kumta ka Seng ka la ai por artaiew ia kine ki dukan ba ki dei ban pynbiang ia ki kot ki sla ba donkam bad lada ka Seng ka lap ba ki ialeh pyrshah kam banse ban leh ia kaba donkam.

Ha ka juh ka por ka Seng ka pynpaw ruh ka jingsngewkhia halor ka jingai licence khaii pathar jong ka Council sha ki bar jylla khlem da bishar ne pyrkhat ia ki trai ri trai muluk kaba dei ruh ka jingpynkhein ia ki kyndon jong ka Council hi namar katkum ki kyndon ain section 10 (2) (iv) jong ka United Khasi Jaintia Hills District (trading by non-tribals ) Regulations,1954 la khanglad ban ai trading Licence ia ki barjylla lada don ki trai ti trai muluk kiba lah ban trei ia ka juh ka kam katkum katei ka aiñ.

Lyngba u kyrwoh ka Seng ka la ong ruh ba ka JHADC kam lah ban ai Licence khaii sha u bar jylla lada ia kita ki jait kam  kiba lah ban leh hi da ki trai jylla, kata nuksa kum  ki dukan die Jain,die juti,dukan die waidong bad dukan khapsniuh.

Kumta na ka liang ka Seng ka kyntu jur ia ka District Council ba ka dei ban pynsangeh noh ha kaba iadei bad ka jingai trading Licence sha ki barjylla khnang ba ki paradoh para snam kin lah ban im jakpoh. Ka Seng ka maham ruh ba kan dang iai bteng ban pynlong ka jingkhynra sa sha  kiwei pat ki thain ha kine ki sngi ki ban wan.