Khuslai mynsiem ki paid nongshong ka Lapangap ban ioh leit rep

Syllad | The Rising MeghalayaJune 27, 2025

Hadien ka jingjynrat naphang iaki tynrai dieng ba la thung beian da ki Karbi hapoh u pud u sam jong ka shnong Lapnagap, ki nongshong shnong Lapangap ki la dap mynta da ka jingkhuslai ba hato kin ioh ne em ban leit rep leit riang da kaba suk ba sain namar ba ki Karbi thang iaki iingtrep bad byrngem ban pynthut iaka jingleit rep leit riang haki pynthor kba kiba don markhap bad ka shnong Karbi kaba tip kum ka Tahpat.

Haba iakren bad u Waheh shnong Ma Deimonmi Lyngdoh ula iathuh ba ka dorbar shnong ka kyntu kynpham iaki nongshong shnong ba kin sangeh shuwa ban leit rep leit riang shaki pynthor namar ba ka jinglong jingman kam pat shngain na ka jingiakynad hapdeng ki Pnar bad Karbi ha khappud Assam Meghalaya.

Ula kyntu ruh iaki bor pyniaid District bad ka Sorkar jylla ba kadei ban pynbiang iaki bor pahara kiba biang bad kham pynbun ki pulit ban synrang iaki nongrep ha ka por ba ki leit rep leit riang sha kitei ki jaka pynthor kiba don markhap bad ka Tahpat.

Ha kawei pat ka liang u Waheh Shnong ula iathuh ba ki nongshong shnong ki la pyntip sha u ba ki pulit Assam kila wan poi ha katei ka jaka ba iakhajia da ki phew kali bad ki la sdang shna ruh iaki kynja sem ha katei ka jaka.

Ula kyrpad iaka Sorkar Jylla ba ka dei ban shim iaki sienjam kiba tyngeh ban phah mih ia kitei ki pulit Assam na katei ka jaka khnang ba kin nym ioh lad satia ban shna iaka ktem pulit kaba pura kumba long ha kiwei pat ki jaka iakhajia khappud.

Shuh shuh u waheh shnong ula iathuh ruh ba nalor ki pulit Asaam, ki paidbah Karbi ruh ki la ap pahara ha katei ka jaka.