Khur takma rnong u Bansahnam Nongbet nakla National Junior Wushu Championship

Syllad | The Rising MeghalayaJuly 9, 2025

U Samla Bansahnam Nongbet uba dang pule ha ka klas XI ha St. Francis Higher Secondary School Smit, East Khasi Hills District u la wanrah burom ia ka jylla da kaba ioh khur ia ka takma rnong ha ka lympung ialehkai ba la tip kum ka 24th National Junior Wushu Championship kaba la long ha ka jylla Telangana.

U Bansahnam u dei tang ma u napdeng ki 9 ngut ki nongialehkai Wushu Junior u ban ioh  khur takma ha kane ka lympung ialehkai kaba la long hapoh Rajeev Gandhi Chowbowli Indoor Stadium, Telengana naduh ka 1 haduh ka 6 tarik Naitung 2025.

Ka Meghalaya Wushu Association (MWA) ha u kyrwoh lyngba u Bah Jerry Fiscal Wankhar General Secretary ka ai ka jingkhublei kitbok kitrwiang ia une u samla uba la ioh ia ka jingjop kumjuh ia kiwei pat ki bym shym la jop da kaba pynshlur ia ki ba kin nangtrei shitom khnang ba kin lah ban leh bha ha ki jingiakop ki ban wan khamtam ha ka jingpynkhreh jong ka kynhun na ka bynta ka 39th National Games 2027 ka ban long ha Meghalaya.