Khur nam jop ka Narwan, Youngstar bad ka Tongseng haka sngi sdang ka Third Div Football ka EJHDFA

Syllad | The Rising MeghalayaJune 30, 2025

Ka Narwan SCSC, Youngstar SCSC Huroi bad Tongseng SYSC kila khur jingjop haka sngi sdang jong ka lympung ialehkai 3rd Division League Stage kaba pyniaid da ka East Jaintia Hills District Football Association (EJHDFA) ha madan artificial turf ha Diengshynrum haka 30 tarik Jylliew.

Haba phai shaka jingialehkai, ka Narwan SCSC kala jop da 3-0 pyrshah iaka Teilang SCSC Lummyrli. Ia kine ki lai kol ka Narwan SCSC la thep da u Shiborlang shadap (17), Jimris Langstang (61) bad Arhowni Shadap (72).

Haka jingialehkai kaba bud, ka Youngstar SCSC Huroi kala pynliem iaka Mookhep SCSC da 4-2. Na kaliang ka Youngstar SCSC la thep da u Wallamborlang Lamin Gadew (11) bad (50), Defirent Surong (47) bad Rining Nongpoh (48). Katba iaki kol jong ka Mookhep SCSC la thep da u Dilas Dkhar (16) bad (75).

Haka jingialehkai kaba khatduh ka Tongseng SYS kala jop da 2-0 pyrshah iaka Umlong SCSC. Ia kine ki ar kol la thep da u Niyos Suchen (49, 63) marwei kaba la biang pura iaka Tongseng ban khur iaka namjop.

Ia kane ka lympung ialehkai la wan ban plie da u ma DH Malang haka jingdonlang u Wilbert Nongtdu ryngkat ki nongialam bad dkhot nongkitkam ka East Jaintia Hills District Football Association.