Khring u Sohniamtra Khasi ka Meghalaya ha ka iew pyni nam ha Bengaluru

Syllad | The Rising MeghalayaDecember 17, 2023

U Sohniamtra Khasi (Khasi Mandarin) ba la pynmih na Meghalaya u la long ka jingphaikhmat bad ka jingiaroh jong kiba bun kiba la wan ban iashim bynta ha ka iew pyni nam ia ki jait soh bad kiwei pat ki mar rep bad jait jingbam ba la tip kum ka “ZestFest 2023” kaba la long ha ka nongbah Bengalura naduh ka 14 haduh ka 17 tarik mynta u bnai.

Ha kane ka iew pyni nam la wan sakhi ruh da ka Myntri  ka Tnat ka rep ka riang ka sorkar jylla ka Dr Ampareen Lyngdoh kaba la pynpaw ia ka jingkmen kaba khraw ban sakhi ia ka jingphaikhmat jong kiba bun ki nongwan iashim khamtam ia u Sohniamtra kumjuh ruh ia u Sohtrun bad kiwei pat ki mar rep ba la pynmih na kane ka jylla.

Ka la ong ruh ba kane ka iew pyni nam ka dei ruh ka rynsan kaba kongsan tam na ka bynta ki nongrep bad kiwei pat ki kynhun kiba iadon bynta ha kaba pynmih ia ki mar rep ban pynpaw pyrthei ia u Sohniamtra jong ki hapoh kane ka sorbah Bangalore.

Sa u Sohniamtra Narwan la shalan sha Dubai

Nalor kata ka la ong ruh ba kum kine ki tamasa ki dei ki rynsan kiba biang tam ban ioh ban pawpaw ia ki mar rep bad ka ban ai mynsiem ia ki nongrep, ki nongpyniaid iew ia ki amr rep lyngba ka jingkyrshan lang jong ka sorkar.

“Kane ka sienjam ka thmu ban pynkhreh ban pyniaid iew ia ki mar rep ka jylla sha ki jaka iew jong ka ri bad sha kiwei pat ki ri ka pyrthei. Nga pynshlur ruh ia ki samla kiba iashim bynta ha kaba die bad pyniaid iew ia kine ki mar rep ba kin nang jam shaphrang namar ki lad ki kabu ki ap na ka bynta jong ki bad ba na ka liang ka sorkar kan dang iai bteng i ki lad aijingiarap,” ong shuh shuh ka Myntri.

Shuh shuh ka Myntri ka la ong ruh ba ki don bun ki jait skhim, kata kum ka FOCUS, CM-ELEVATE, bad ka PRIME ia kiba la pyntreikam ban pynbit pynbiang ha kaba iadei bad kum kine ki bynta.

Poi u Sohniamtra na Jylla ha Dubai ha iew LuLu Hypermarket

“Mynta ngi sakhi ruh halor ka jingiohlad ban pynpaw ia ka kolshor ka jylla. Wat ka jylla Karnataka ruh ka don ia shibun ki jaidbynriew kiba dei ki riewlum. Wat hapdeng ki jingiapher, hynrei ka don ka jingiatylli ha ka liang ka kolshor ha ka jinglong jingman bad ha ki jait jingshad ba bun rukom kaba pynpaw ruh ia ka jingriew spah ka jong ngi ha ka liang ka kolshor,” ong shuh shuh ka Dr. Ampareen.