Khot wer ka Synjuk Waheh Chnong Jowai sha ka jinglehkmen pdiang burom ia u Snem Thymmai

Syllad | The Rising MeghalayaDecember 29, 2023

Ka Synjuk Waheh Chnong Jowai ha ryngkat ka District Tourism Officer, West Jaiñtia Hills District kala khot pynlong iaka jinglehkmen pdiang burom ia u Snem Thymmai (New Year) haka 1 tarik Kyllalyngkot 2024.

Ha kane ka sngi naduh ka por 4 baje nohphaisngi yn pdiang ia baroh ki Dorbar Chnong kiba iashimbynta haka jingshad New Year ha Stand Nangbah, Iawmusiang, Jowai ba kin shimti iaki memento nangta kin leit sha ki jong ki jong ki shnong.

Kumta ka synjuk ka khot wer ia baroh kiba na jan na jngai ban wan sakhi ia kane ka jinglehkmen kum ka dak ban iashimbynta ban pdiang ia u Snem Thymmai.

Ka lynti ban iaid ki nongshad ka long- Khimusniang, Mynthong, Chutwakhu, Tympang Iawmusiang, Mission Compound, Loomkyrwiang, Chiliangraij, Panaliar bad ka Tpep Pale kin wan na surok Wah Nangbah bad ban leitphai na Iongpiah, Tpep Pale ter ter.

Katba ka shnong Lumpariat, Mookyrdup, Caroline Colony, Ladthadlaboh, Moosalyngkat, Dongmihsngi, Salaroh bad ka Loomsooiung Newhill kin wan ha katei ka jaka kaba la pynkhreh na khmat Blue Heaven bad hadien bala dep ka pali jong ki kin leit phai biang na ka juh ka lynti.

Ka Synjuk lyngba u kyrwoh bala phah u general secretary Riquoma RQ Laloo kala kyntu ia baroh ki shnong ban bud ryntih iaka lynti bala pynbeit khnang ban lait na ka jingkhapngiah.

Ka Synjuk Waheh Chnong Jowai ryngkat bad District Tourism Officer, West Jaiñtia Hills District kila khublei ia baroh ha kaba iadei bad ki kam kiba la lah ban pyndep ha u snem bad barim da ka jingiatreilang ryngkat ryngkat. Kila ai khublei Snem Thymmai ia baroh u nongshong shnong da ka jingkyrmen ban ioh iaka koit ka khiah bad ka jingkyrkhu kyrdoh ha baroh ki liang.