Wer iashimbynta u DEO ban pynthymmai iaka electoral roll ha West Jaintia Hills

Syllad | The Rising MeghalayaNovember 9, 2023

U Deputy Commissioner (Election), West Jaintia Hills District ula pynbna paidbah ba ka Election Commission ka la rai ban pynlong ia ka Special Summary Revision (SSR) 2023 hapoh ka District ha baroh ki Polling Station ban pynthymmai iaka photo electoral roll katkum ka jingot snem haka 1 tarik Kyllalyngkot 2024.

Kane ka long katkum ka jingpynbeit ka Election Commission jong ka Ri India, bad ha une u snem kala pynbna ba iaka SSR naduh u bnai Jymmang 2023 kaba ka jingot snem ka long 01.01.2024.

Halor kane, kito ki nongshong shnong kiba la dap 18 snem ka rta katkum katei ka tarik, ki bym pat don kyrteng ha ka draft Electoral Roll ki lah ban pynrung kyrteng ialade ha ka Polling Station ba ki shong ki sah, kumjuh ruh ban ot ne weng kyrteng ia kito ki ba la iap ne phet shnong noh bad ia ki jingbakla ruh yn pynbeit ha kane ka por.

Ha ka jingiadei bad kane, ia ka Draft Photo Electoral Roll lah pynmih ha ka 27.10.2023 ha ka ophis jong U District Election Officer, ki Electoral Registration Officer bad lyngba ki Booth Level Officers ha ki Polling Station. Ia ki jingtyrwa bad jingdawa ne jingujor kyrteng yn pdiang naduh ka 27.10.2023 haduh 09.12.2023.

Ha kaba iadei bad kane ka kam la kyntu iaki nongshog shnong ban snohktilang bad ka ophis da kaba don ryngkat bad ki briew jong ka ophis ki ban wan pynlong ia ka awareness programme kum shi bynta jong ka SVEEP programme naka bynta ki jingpynrung kyrteng bad ruh ban pynshai ia ki kam kiba iadei bad ka General Election to Lok Sabha (MP) ka ban sa long ha u snem 2024 ban ioh pynmih iaka electoral roll kaba pura.