Khot thep kyrteng thymmai ban die rashon ha West Jaintia Hills

Syllad | The Rising MeghalayaSeptember 21, 2021

U Deputy Commissioner (Supply) West Jaintia Hills District, Garod LSN Dykes haka sngi ba ar ula khot thep kyrteng thymmai iaki cooperative society, ki sengtreimon sngewbha, bad ki SHG na ka bynta ba ka sorkar kan thung iaki kum ki nongdie rashon na ka bynta u snem 2022 ha ki wholesale centre.

Kine ki Wholesale Centre ki kynthup ha ki shnong ha sor Jowai,  Ummulong, Nartiang, Shangpung bad ha Sahsniang.

Ki ba kwah ban aplai ïa kane ka kam ki lah ban ïoh ïa ki aplikeshon Form –I na ka ophis jong u Deputy Commissioner (Supply) ka West Jaintia Hills District. Ka tarik ba khadduh ban pynpoi ïa ki aplikeshon ha ryngkat ki kot ki sla ba donkam kan long ha lane shwa ka 4 tarik u October (Risaw), 2021.

Ki kot ki sla ba donkam ba ki kynthup ïa ka Court Stamp fee Rs.25/-, lai tylli ki dur shiteng, ka Bank guarantee T.1 lak tyngka na ka bynta ki riewlum bad T.2 lak tyngka na ka bynta ki bym dei riewlum haka non judicial stamp ba T.10/-

Donkam ruh ban ïoh jingthoh na ki Rangbah Shnong halor ka jingdon jong ka jaka buh iaki mar, ka dur jong ka jaka buh mar, ka Trading license na ka bynta ki bym dei riewlum, ka sale tax clearance certificate, ka Schedule Tribe/caste Certificate, Residential Certificate na ki Rangbah Shnong bad ki Certificate kiba ïadei bad ka jingdon jingtip halor ki kam internet.

Kino kino kiba shah jied katkum kane ka hukum, ka por ka long haduh 31.12.2022 lane lah ban bteng ïa ki haduh ka 31.03.2023.

Shuh shuh U Sub Divisional Officer (Supply) Amlarem Sub Division ruh ula khot thep kyrteng thymmai ia ka kam die rashon ha ki whole centre ha Amlarem (2 ngut), ha Nongtalang (1-Iwei), ha Dawki (I iwei) bad ha Muktapur (1 iwei).

Ia ki phorm lah ban leit shim na ka ohis treikam naduh 21 Nailur (September) haduh 4 tarik Risaw (October). Ka tarik ba khatduh ban thep ka long 20 Risaw (October) 2021.