Khot jingialang u DC bad ka SCB halor ki nongshong beain ha Lum Survey

Syllad | The Rising MeghalayaApril 30, 2024

U Deputy Commissioner ka East Khasi Hills, u SC Sadhu haka 30 tarik Iaiong un pynlong ka jingialang bad ki nongmihkhmat na ka Shillong Cantonment Board (SMB) ban iakren ha kaba iadei bad ki briew kiba shong beain ha Lum Survey, Shillong.

Ia kane la pyntip da u president ka Hynniewtrep Youth Council (HYC) u Bah Roykupar Synrem hadien ka jinialang bad u Symbud Myntri Rangbah ka Jylla uba khmih ia ka Tnat kam pohiing, u Bah Prestone Tynsong hynne ka sngi Nyngkong.

U Bah Synrem u la ong ba la pyntip sha ki ba u DC un khot pynlong ia ka jingialang bad ki nongmihkhmat na ka SCB halor katei ka mat haka 30 tarik Iaiong.

Haba aiti ia ka dorkhas sha u Bah Tynsong ba un tuklar halor kane ka kam, u president ka Seng u la ong, “Ngi dawa ba ki bor ba dei khmih jong ka sorkar Jylla ki dei ban shim ia ki sienjam ban leh ei ei mardor ban kyndang noh ia kine ki briew kiba shong beain bad ban pynpra mardor ia ki iing ki sem ba la shna beain.”

Nalor kata u la pyntip ba ha ka 25 tarik mynta u bnai, ka HYC ka la pynlong ia ka jingleit jurip halor ka jingdon jong ki briew kiba shong beain ha ka lyngkhot jaka kaba don marpyrshah ka Tnat Fire and Emergency Station ha Iewduh, Shillong hadien ba ki la ioh pdiang ia kiba bun ki jingujor na ki paidbah nongshong shnong.

“Ha kane ka jingleit jurip ngi la shem ba ki don haduh kumba 80-100 tylli ki iing ki sem ba la shna beain ha kane ka jaka bad kaba la iasyriem ruh kum ka jaka slum. Nalor kata la ioh jingtip ruh ba kine ki briew ki la shong beain ha kane ka jaka khle da ioh jingmut na ka Cantonment Board, Shillong Municipal Board lane na kino kino ki bor ba dei khmih,” ong u nongialam ka Seng.

Shuh shuh u la ong ruh ba ka jinglong jingman jong ka jaka ka dei ka bym biang na ka bynta ban shong briew bad ka long ruh ka jingpynsniewdur ia ka nongbah Shillong bad ia ka Jylla hi baroh kawei.