Khot hajir ka iing bishar Meghalaya High Court ia u SP East Jaintia Hills halor kam tih dewiong beaiñ

Syllad | The Rising MeghalayaDecember 7, 2023

Ka iingbishar Meghalaya High Court haka 6 atrik Nohprah, kala khot hajir ia u Superintendent of Police ka East Jaintia Hills ha ka 11 tarik Nohprah ha kaba iadei bad ka jingbteng ka jingtih dewiong beain hapoh ka District.

Katkum ka hukum ka division bench kaba kynthup ia u Chief Justice (Acting) HS Thangkhiew bad u Justice W Diengdoh ka la ong “Da kaba pynshong nongrim halor ka jingshem jong ka Single Member Committee, u Superintendent of Police ka East Jaintia Hills District la hukum ba u dei ban wan mih da lade hi hakhmat ka iingbishar ha ka 11 tarik mynta u bnai ha ka por 10:30 mynstep ban ai ka jingpynshai ha kaba iadei bad kane ka phang.

“Ka jingshisha ka long ba watla ka jaka theh dewiong ka don ha ka jaka ba tip da kiba bun balang, kata ha lyndet ka Don Bosco College, Byndihati, kumta kane ka pynpaw halor  shibun kiei kiei halor ka rukom treikam jong ki heh ophisar ba dei khmih, kata khamtam u khliehduh ka tnat pulit ka District u Superintendent of Police, ia kaba la khot ba dei ban ai jingpynshai” kala ong.

Na ka liang ka sorkar jylla kala ai iaka kaiphod halor ki sienjam kiba ka lashim halor ka jingai jingmut da ka Single Member Committee jong u Justice BP Katakey (Retd) ha ka 18th Interim Report.

Na ka liang ka Committee kala pan ruh ia ka kaiphot na u Deputy Commissioner ha kaba dei ban aiti hapoh ka shitaiew ban pynshai ba kumno ka jingtih dewiong beain ka dang bteng hapoh ka District.