Khlem ka ILP ym donkam ia ka lynti rel ha Jaintia Hills, ong ka JSU

Syllad | The Rising MeghalayaOctober 13, 2023

Ka Seng Jaintia Students’ Union (JSU) Central Body hynne ka sngi Thohdieng ka la pynpaw ia ka nongrim kaba skhem ban ieng pyrshah ia ka jingthmu jong ka sorkar ban wanrah lynti rel hapoh ka thain Khasi Jaintia lada ym lah ban pyntreikam ia ka Inner Line Permit (ILP) ha kane ka jylla.

“Kam don jingmyntoi ban pyniasoh lynti rel katba ym pat lah ban pyntreikam ia ka ILP ha ka jylla jong ngi,” ong u president ka JSU Jersom Shylla.

Kane ka la wan long ruh khyndiat sngi hadien ba u Symbud Myntri Rangbah ka jylla u Sniawbhalang Dhar dang shen u la pynpaw ba ka sorkar kam pat don ia ka jingthmu ban pynkut noh ia ka mat kaba iadei bad ka jingwanrah lynti rel ha ka thain Khasi Jaintia.

Ka JSU ka la ong ruh ba ki don tang khyndiat ngut ki briew, kata kiba bun na ki, kiba dei ki nongkhaii napoh Jaintia Hills kiba kwah ban wanrah lynti rel hapoh ka thain.

Da kaba pynpaw ba ka ILP ka dei ka ain ba pyrkhing ka ban khanglad ia ka jingwan rung beain jong ki briew kiba nabar sha ka jylla Meghalaya ban iada ia ki hok bad ia ka kolshor jong ki trai shnong bad ki kynhun nongshong shnong ki jong ngi, la ong u general secretary ka JSU u Treiborlang Suchen bad bynrap ruh “Khlem ki lad jingiada lyngba ka ILP, ka jingwantuid jong ki briew kiba nabar lyngba ka jingpyniasoh da ka lynti rel ka lah ban ktah jur ia ka imlang ka sahlang ia ka ioh ka kot jong ki trai shnong jong ka thain Jaintia Hills.”

Ha kaba iadei bad ka jingiapher ha ki dor ki mur hapdeng ka Assam kaba la dep lypa ban pyniasoh da ki rel bad ka Meghalaya, ka JSU ka la pynpaw ba ki mar ki mata hapoh Assam ki kham rem bun shah haba ia nujor bad ki mar ki mata ha Meghalaya, bad dei ruh ban tip ba ka dor jong ka dewbilat ka kham rem ha ka jaka ba la pynmih na ka jylla Meghalaya haba ia nujor bad ka Assam, kumta ruh ka mat kaba iadei bad ka jingthmu ban wanrah lynti rel ban pynsuk ban shalan dewbilat sha kiwei pat ki jylla kan shu pynmynroi tang ia ki nongkhaii hynrei ym ia ki paidbah ka Meghalaya.

Kumta ruh ka JSU ka la ong ba ka jingwan jong ka lynti rel kan ym don jingmyntoi hynrei kan shu pynjur ia ka jingwan rung jong ki briew kiba nabar, bad kane kan ktah jur ia ka imlang ka sahlang, ka ioh ka kot ha ha kiba bun ki bynta ia ka jylla.