Khlad uwei hashen ba iatakhuh kali ha Mihmyntdu

Syllad | The Rising MeghalayaAugust 30, 2020

Uwei u briew ula khlad hashen haka aksident kaba la jia hynne ka step ha Moomon, Mihmyntdu hajan ka ophis jong ka tnad Soil and Water Conservation, Jowai.

Ka khubor kaba iohlum ka iathuh ba kane ka aksident kala jia haka por kumba 1.15 am ha kaba ka kali Maruti Celerio ML-04-C-8413 kaba wan naka thian Phramer kaba niah da Pyrkhat Suchiang ba na Thadmuthlong Pyrdi, West Jaintia Hills kala tynrah iaka trok na shadien.

Kane ka trok dei kaba don u nomber AS-10-C-2128 kaba la pynieng harud surok na kawei ka liang.

Ha kane ka jingjia u nongniah ula khlad hashen katba u wei uba shonglang haka kali maruti celerio u David Phawa ba na Mihmyntdu ula mynsaw jur bad la pynkit mar mar sha Dr. Norman Tunnel Hospital.

Hadien bala ioh ka jingsumar na Dr Norman Hospital la pynkit ia u David Phawa sha Super Care, Hospital, Shillong ban ioh ka jingsumar.

Ki Pulit jong ka Jowai Traffic Police kila shimti bad rah iaka met u Pyrkhat Suchiang sha jaka buh metiap ka Civil Hospital Ialong. Kila pyndep ruh ia baroh ki jingdonkam jong ka aiñ bad la tan ruh iaka kali sha Jowai Police Station bad ka jingtohkit kala iaid shakhmat halor kane ka jingjia.