Khlad u player Table Tennis ka Tamil Nadu haka aksiden kali ha Shangbangla Ri Bhoi District

Syllad | The Rising MeghalayaApril 17, 2022

Shi sngi shwa ba ka jylla Meghalaya kan khreh ban plie noh iaka pyrda ka lympung ialehkai 83rd  Senior National Table Tennis Championship, pynban la ioh pdiang shwa iaka khubor kaba sngewsih, hadien ba uwei na ki rang ialehkai Table Tennis ba dei napoh ka jylla Tamil Nadu u la khlad noh bad lai ngut kiwei pat ki la mynsaw, hadien ba kila ngat noh ha ka apot jong ka jingiatakhuh kali, kaba la jia ha Shangbala, Ri Bhoi District.

Une u nongialehkai ka Tamil Nadu u dei u Deenadayalan Vishwa.

Kane ka jingjia ka la jia, hadien ba u Vishwa lem bad ki paralok ki jong u, ki dang thmu ban wan kiew shane sha ka nongbah Shillong khnang ban ioh ban mihkhmat ia la ka jylla ha kane ka lumpung bah, ban sdang iaka naduh lashai ka sngi.

Kat kum ka kyrwoh jong ka Meghalaya Table tennis association, kane ka jingjia ka la jia ha ka por 1:50 baje nohphai sngi, hadien ba u Vishwa bad lai ngut kiwei pat ki dang shong da kawei ka kali tourist kaba la leit shaw ia ki na kad liengsuin na Guwahati.

Ha ka khyllipmat ba ki la poi ha Shangbangla, la ong ba kawei ka trok 12 shaka, ka la sam lyngba beit iaka surok (divider) bad dain ka tynrah beit ia kane ka kali tourist kaba la don u Vishwa bad ki paralok ki jong u.

Hadien kane, mar mar ia kine baroh kiba mynsaw la pynkit noh shwa ha Nongpoh Civil Hospital, ha kaba u Vishwa la ong ba u la khlad noh shwa ban poi ha kane ka jaka ai jingsumar, katba ia ki paralok ki jong u la wan ban pynkit noh pat sha NEIGRIHMS, Shillong.

La iathuh ba kine ki lai ngut kila lait na ka jingma bad ba ki dang don hapdeng ka jingsumar ha kane ka jaka.

Ki kmie ki kpa u Vishwa kin wanpoi lashai ka sngi ha Nongpoh ban wan ban shimti ia ka met u khun u jong ki bad naka liang ka Meghalaya Table Tennis Association kaba dei ka nongpynlong ia kane ka lympung ialehkai ha la ka jylla, ka la pynbiang ruh ia la ki dkhot ban don ha Nongpoh ban iarap ha kaban synran lang iaka kmie bad kpa u Vishwa ban kit noh sha ka iing ka sem khnang ban ioih ban pyndep iaka lehniam leh rukom kaba khatduh.

Na ka liang ka MTTA lyngba u Bruce P Marak bad u Chiranjib Choudhury ba dei Vice President bad Secretary ki  phah ia u kyrwoh sngewlem sha ka synjuk ialehkai Table Tennis ka Tamil Nadu bad kumjuh sha ka iing ka sem u Vishwa, uba dei uwei na ki nongialehkai uba la sdang ban khie bad san bha ha ka jingim bad khreh ban paw bad tyngshain bha na ka bynta ka jylla bad ia ka ri.