Khlad noh u Bah SD Khongwir MLA barim ka Mawlai ha ka rta 90 snem

Syllad | The Rising MeghalayaNovember 21, 2023

U MLA barim ka Mawlai uba dei ruh u riewsain hima ba la rim bha, u bah SD Khongwir u la khlad noh hapdeng ka jingshah sumar hapoh NEIGRIHMS haka sngi ba Ar ha ka rta 90 snem, kata hadien ka jingshitom kaba la bat kham slem. Ia ka met jong u la pynkit noh sha la ka jong ka iingsah ha Mawlai Nonglum.

U Bah Khongwir uba la bat kum u MLA ka Mawlai haduh 25 snem kynthih tad haduh ba un shongthait noh na ka kam sain hima ha u snem 1998, u dei ruh u riew sain hima uba pawkhmat ym tang hapoh la ka jong ka constituency hynrei ha ka jylla hi baroh kawei.

Nalor kata u Bah SD Khongwir u dei ruh uwei na ki riew sain hima ba pawkhmat naduh ka por ba ka Meghalaya ka la ioh la ka jong ka jylla. U la rung nyngkong eh sha ka kam sain hima da kaba shah jied kum u nongmihkhmat (MLA) ha ka snem 1972 bad bteng ban ioh ia ka jingjop tad haduh ka snem 1993, kata hashwa ba un jied ban ym iakhun shuh ia ka ilekshon ha ki snem kiba bud.

Ha ka jingiaid lynti kaba jlan ha ki kam sain hima, u Bah Khongwir u la bat ia kiba bun tylli ki kam, kata kynthup kum u Symbud Myntri Rangbah ka jylla ha ki sorkar ba la ialam da u (L) Darwin Diengdoh Pugh bad u (L) Brington Buhai Lyngdoh. U la bat ruh kum u Myntri ba dei khmih ia ki Tnat bapher bapher bad ruh kum u Chairman jong ka State Planning Board.

Kum u nongialam ba pawkhmat jong ki seng riewlum, u Bah Khongwir u la don hapoh ka Seng Hills State People Democratic Party (HSPDP) bad don ruh ia ka bynta kaba kongsan ha kaba thaw ia ka Seng United Democratic Party (UDP).

Nalor ka jingnoh synniang kum u riewsain hima, u Bah SD Khongwir u la bat ruh kum u Rangbah Shnong jong ka shnong Mawlai Nonglum haduh 55 snem kynthih, bad u la bat ruh kum u president jong ka Mawlai Town Dorbar (MTD) naduh u snem 1988.