Khlad noh ka nurse na ka jingpang ‘rabies’ hadien ka jingshah dait ksew

Syllad | The Rising MeghalayaSeptember 18, 2024

Kawei ka nurse kaba trei kum ka Mid Level Health Provider (MLHP) ka la khlad noh na ka jingpang rabies ha ka 16 tarik Nailur hapoh Civil Hospital Shillong, kata ar bnai hadien ba ka la shah dait ha u ksew surok.

Ka Kong Gracetyfull Marngar 32 snem rta ka dei kaba trei kum ka MLHP hapoh Tynghor Health Sub Centre, West Khasi Hills District hadien ba ka la ioh ia ka jingpang rabies na ka jingshah dait ha u ksew surok naduh kine ki ar bnai ba la dep.

Haba pynthikna halor kane ka jingjia, na ka liang ka Myntri ka Tnad ka Koit ka Khiah Dr Ampareen Lyngdoh haka 17 tarik Nailur kala ong, “Ngi la duh noh ia kawei ka dkhot jong ka tnad ka Kong Gracetyfull Marngar kaba dei na ka shnong Laitkseh, West Khasi Hills kaba la khlad noh ha ka 16 tarik Nailur hapdeng ka jingshah sumar. Ka la shah dait ha u ksew surok naduh ki ar bnai ba la dep, hynrei na ki katto katne ki daw kam shym la leit ban ai ia ka injek anti-rabies.”

Hadien jong kane ka jingjia na ka liang ka Myntri ka la ong, “Nga sngewsih bad khuslai jur..Mynta ngin tyrwa ban buh noh ia ki dawai injek anti -rabies hapoh ki sub centre ruh kumjuh.”