Khlad ka samla ba tynrah ka Alto ia ka thuk thuk ba ka shong bad u samla ha Sohryngkham

Syllad | The Rising MeghalayaMay 30, 2025

Kawei ka samla kaba la tip kyrteng ka Saphisha Tiewksiar Nongkhlaw 18 snem rta na ka Shnong Nongthymmai Jingkieng kala khlad noh hadien ba kawei ka kali Alto 800 rong saw ka la tynrah ia ka thuk thuk kaba ka shong ha ryngkat u samla jong ka ha surok bah Sohryngkham ha ka janmiet jong ka 28 tarik Jymmang.

Na ka liang une u samla jong kane ka lanot uba kyrteng u Alexter Khrawbor Mulat 20 snem rta uba niah ia kane ka thuk thuk ha ka por ba la jia ka jingshah tynrai u la iathuh ba kane ka jingjia ka la jia ha ka por kumba 6.30 janmiet katba ki dang wan shangkai ha ryngkat kiwei pat ki paralok na kawei ka jaka jngohkai kaba don ha katei ka thain.

U la iathuh ruh ba hadien ba ki la wanphai na katei ka jaka shangkai u la sangeh ia ka thuk thuk harud surok bah Sohryngkham, kata kham pajih na ka shnong Sohryngkham da ka jingthmu ban leit shabar katba kiwei pat ki paralok ki la jam noh shakhmat.

Hadien kan u la ong ba ki la ia mih noh na kane ka jaka hynrei kynsan kynsan kawei ka kali Alto rong saw kaba ym lah ban ithuh ia u nombor kali kaba la pynher sted bha ka la wan tur beit beit sha ka liang ka jong ki bad tynrah ia ki, bad hadien kane ka Alto kam shym la sangeh hynrei ka la phet krad noh na kane ka jaka.

Hadien kane ka jingjia la pynkit noh mar mar ia kane ka samla da ka Ambulance hapdeng shapoh Civil Hospital Shillong ban ioh ia ka jingsumar, hynrei kane ka samla ka la khlad noh namar ka jingmynsaw jur.