Khlad ka longkmie bad I khun ha kpoh ha MCH Jowai, kynnoh kiba iing ba slem ioh jingsumar

Syllad | The Rising MeghalayaJune 5, 2025

Kawei ka longkmie kaba armet kala khlad noh bad I khunlung ha kpoh ha hospital Maternal and Child Health (MCH) Hospital ha Panaliar, Jowai haka miet 4 tarik Jylliew ha kaba na kaliang kiba haiing kila kynnoh ba kane ka jia namar ba ka slem ban ioh iaka jingsumar.

Kane ka longkmie ka dei ka Kong Pynche Bareh 37 snem rta, na ka shnong Jalaphet, East Jaintia Hills District. Kane ka longkmie dei kaba la phah ne refer na Sungta CHC sha MCH Jowai ban kan ioh iaka jingsumar kyrkieh ban kha ia I khunlung.

La iathuh ba kala poi ha kane ka hospital haka 3 tarik Jylliew da ka jingthmu ban kha ia I khun iba phra, hynrei kala ngat noh ha kane ka apot kaba sngewsih.

Ka Kong Beautiful Bareh kaba dei shipara bad ka kmie ka kong Pynche, kala kynnoh ba ka jingkhlad jong ka (Pynche), ka dei namar ka jingbym wan jong ki doktor bad ki nos ban sumar iaka haka por kaba biang, bad ruh ka jingkhein sting jong ki doktor bad nos katei ka hospital.

“Lada ka hospital kam lah ban ai ka jingpynshai kaba biang halor ka jingkhlad ka khun ka jong ngi, ngin ym rah iaka met jong ka, ngi hun ban ieh” la ong ka Kong Beautiful Bareh.

Haba iathuh halor kane ka jingjia, kala ong ba iaka para ka Kong Pynche, la pynkit nyngkong sha Sutnga CHC haka 2 tarik Jylliew hadien ba ka mad iaka jingphlei snam, bad ki doktor ka CHC ki phah noh iaka sha MCH Jowai ban ioh jingsumar kaba kyrkieh.

Kila poi ha MCH Jowai haka por 1.00 baje nohphai sngi jong ka 3 tarik Jylliew bad haka step 4 tarik ki doktor kila bthah iaka Pynche ban ym bam ym dih shuh namar ba kala dei ka por kha bad ban sumar noh iaka.

Hynrei hapdeng ka jingshah thngan, ki ba haiing kil kynnoh ba na ka liang ki doktor ki khlem wan peit wan jngoh iaka, wat haba kila pyrshang bun bunsien ban leit kylli na ki nos hato kin sumar ne ym sumar khnang ban ai jingbam namar ba kala sdang kem tlot.

Hynrei haka por nohphai sngi, ki nos ki pyntip ba kamdei ka sngi ban sumar iaka, kumta kila bthah iaki ba haiing ban ai bam ai dih noh iaka bad ba ka Kong Pynche kala ioh ban bam ban dih haka por 1.00 baje nohphai sngi.

Dei hadien katto katne por, kata haka 5 baje janmiet ka Pynche kala shitom na ka jingphlei snam bad haba ki pyrshang ban pan jingiarap na ki nos hynrei ki nos kila mai kila tim pynban iaka, la kynnoh ki ba haiing.

Hadien kane ka jingjia phlei snam, ki ba haiing ki iathuh ba u doktor ula wan ban peit ia katei ka longkmie bad phah soi kot ban phah sumar noh sha kiwei ki jaka sumar hynrei la lap ba la dier ka por bad kane ka longkmie kala khlad noh bad i khun hapoh kpoh haka por 9.30 baje janmiet.

Haba ioh ban iakren bad u doktor katei ka hospital ula ong, ka jinglong jingman ka koit ka khiah longkmie armet ka long kaba biang bad ngi pyrkhat ba kan kha suk kha sain, hynrei haka por 8.30 baje janmiet ka jinglong jingman ka koit ka khiah kala sdang ban kylla.

Ha kaba iadei bad ka jingkynnoh ki ba haiing hasem, na ka liang u doktor ula ong kat haduh mynta ym pat lah ban ong eiei namar ma ki ruh ki hap wad bniah halor kane ka jingjia.

Ula ong ruh ba kala kha bun ngut ki khun, bad ka scanning jong ka ka pyni ba don 3-centimetre ka um bad ka sngi ban kha kadei haka 12 tarik mynta u bnai. Ula ong ba ki doktor kila pyrshang ban ai ka Alamin Drip ar bilor da ka jingthmu ban don khyndiat ka um bad ba kan lah hi ban suh kha.