Khie bitar ki MDC thymmai ka VPP bad Congress ba bteng ka JHADC ban ai work order sha ki MDC barim

Syllad | The Rising MeghalayaJuly 4, 2025

Ka jingbteng jong ka JHADC ban ai work order shaki katto katne ki MDC kiba la shah rem noh ka la pynbitar shikatdei eh iaki MDC jong ka seng Voice of the People Party (VPP) bad Congress haduh ba ki la leit buh syndon da ka dorkhas ha u Deputy CEM jong ka Jaintia Hills Autonomous District Council (JHADC) u Ma Lasky Rymbai haka 3 tarik Naitung.

Kine ki MDC kila pynpaw ka jingpyrshah halor ka rukom treikam jong ka JHADC kaba aiti work order shaki MDC kiba la shah rem noh ban pyntrei iaki MDC skhim ka konsil, da kaba ong ruh ba kane ka pynhiar dor iaka bor treikam jong u MDC uba la jied da u paidbah ha u snem 2025 bad ruh ka hok synshar paidbah.

Katkum ka dorkhas ba la aiti ha u Ma Lasky Rymbai uba dei ruh u EM ba peit iaka tnad Civil Work, kila ong kila ioh jingtip ba ka JHADC kala pynmih bun tylli ki work order shaka Development Committee kaba dei jong u MDC barim ne Ex MDC.

Shuh shuh ka dorkhas ka la ong ba katkum ka Para 2 (7) jong ka Sixth Schedule, u MDC un treikam katkum ka por kaba la buh da ka aiñ, lait noh lada shah weng ne shah pynbeit hapoh ki kyndon ba la buh bad um lah shuh ban shim bynta haka synshar ne ka Development bad ka Committee kaba iadei bad u ruh ka kut noh ka bor treikam.

Halor kane, kine ki MDC kila buh jingkylli da kaba ong ka kyndon bad hukum aiu kaba la pynkup bor iaka Development Committee jong u MDC barim ban shim ban bad pyntrei iaki skhim bad la don mo ka jingpynbna paidbah kaba ai bor shuh shuh iaka committee jong u MDC barim hadien ba um long shuh u MDC jong kata ka Constituency bad ha kajuh ka por kila dawa ruh na ka EC ba kan ai jingpynshai lyngba ka jingthoh halor kane ka kam.

U MDC ka Shilliangmyntang Ma Daeimi Liam, ula ther tyngeh iaka tnad Civil Work bad kynnoh ruh ba la aiti iaki work order shaki MDC barim dang ha kine ki bnai ba la dep kata ruh khlem da pyntip shaki MDC kiba thymmai.

Shuh shuh u Ma liam ula ong haba buddien halor kane na u EM kila ioh pynban ka jubab ba lah ban treikam lang da ka jingiasngewthuh jingmut hapdeng u MDC barim bad u MDC bathymmai, da kaba u pynpaw ruh ka jingsngew phylla ba ka ain aiu kaba la aplai hapoh JHADC.

Ka Kong Deivipaia Tongper kala pynpaw ka jinglyngngoh ba don kiwei ki constituency ki ailad ba u MDC thymmai un pyntreikam ia kita ki skhim bad ong ba kane kadei tang ka jingleh shilliang bad jingibein iaki MDC bathymmai.

“Lada uta u MDC uba shah rem u dang lah ban pyntreikam iaki skhim pynroi hapoh ka constituency, te ka myntoi aiu ia ngi ki MDC bathymmai ban jop”, la ong ka Kong Deivi da kaba kyntait ruh ban pdiang iaki jingbatai jong u EM lane ka Department ka jong u.

Katba u Ma Rikut Parien ula ong ngi khlem pyrshah ïaka skhim, hynrei kaei kaba ngi pyrshah ka long kumno ka Committee barim ka dang im bad lah ban pyntrei iaki skhim nalor ba u MDC barim ula kut noh ka por treikam jong u. Shuh shuh ula ong haba pan jingshai na u EM la ïoh jubab ba kane ka dei ka skhim jong ka sorkar kmie bad katkum ka jingpynshai jong u (EM) ba la dep issue iaka Preliminary work order hashwa ka Election.

U Ma Jamshaphrang Pohtam ula ong iaki skhim hapoh ki constituency bapher bapher la kidei jong konsil ne sorkar kmie dei ban pyntreikam da u MDC bathymmai ne MDC ba mynta.