Khanglad ka Rangdajied ban bteng khur namjop ka Nangkiew Irat haka SPL

Syllad | The Rising MeghalayaSeptember 5, 2025

Katta ka snap ba ka dei ka hynmen ka iai wan ba kan mih paw ia ka kynhun ialehkai ka Rangdajied United FC hadien ba tden ka la lah ba kan khanglad ia ka kynhun ka Nangkiew Irat ban bteng ban jam shakhmat ban khur ia ka jingjop ka jong ka ha ka lympung ialehkai ka Shillong Premier League, hadien ba ka la lah ba kan tan sha ka jingiakhaid kaba long da mar shi kol, haka jingiakhun kaba la long haka 4 tarik Nailur.

Haba phai sha ka jingiakhun, dei ka Rangdajied kaba la lam khmat ban ioh pynkhih nyngkong ia ka jar haka minit kaba 23 kaba la wan lyngba u Manbhakupar Iawphniaw, ia kaba u Wanlamsuk Nongkhlaw uba la wan mih na ka ben shong u la ioh pat ia ka kabu ksiar ban pynphai ia kane ka kol naka bynta ka Nangkiew Irat ha ka minit kaba 66.

Ka jiingiakhun hapdeng kine ki ar kynhun ka la kham pynbun kam bha ia u referee bah P. Mawthoh,  ba pyniaid ia kane ka jingiakhun, ha kaba la don ruh ki khep, ba un sei beit beit da ki yellow card kum shi bynta ban tem ia katta ka sur ialehkai kaba khluit bha da ki player jong baroh ar kynhun ha madan, tad haduh ba u la hap ruh ba un da sei wat da ka red card ia u player jong ka Nangkiew Irat bad kumjuh ia u coach ka Rangdajied, kaba lehse kaban ktah bha ia baroh ar kynhun  ha ki jingiakhun kiban wan.

Kum ka kynhun, na ki jingiakhun kiba la dep baroh, kala pher bha ka rukom ialehkai ka Rangdajied, ha kaba man la u player u jong ka, u da pyni shisha ia katta ka jingthrang bad sliang kum ka kynhun ba kan wanphai beit napdeng ka madan iakhun daka jingjop.

U Stephanson Pale arsien arwat u la lah ban tynjuh borbah ia ka u rang ap kol ka Nangkiew u Surjay Kumar Pariyar tang hapoh ki 15 minit ba la sdang ka jingiakhun, hadien kane sa uwei pat u rang ialehkai kampher wat lada um shim la rung satia ka kyrteng haka thup thep kyrteng, pynban u Micky Marwein, u dei u namtam na bynta ka Rangdajied, uba la pynpaw shynna ia katta ka buit ka sap bad jingtbit ialehkai ka jong u, namar dei lyngba jong u ba ka pynlong ia u Manbha ba un ioh ban thep ia ka kol, kaba dei artad kaba 50 jong kane ka lympung iakhun mynta ka samoi.

Haba wan ban bteng ia ka kylla miet, u Wanlamsuk u la wan mih naka ben shong bad mih pli ha ka jaka jong u Raikutshisha Buam bad marsien ia rung, u la lah  ban pynkhih win ia ka kut ialehkai ka Rangdajied, kaba pynlong ia ka Nangkiew Irat ba kan ioh ia ka kabu ba kan shut ia ka corner, kaba hangne ka bol ka la hap beit ha kut ka 6 yard ha kaba u Kerichard L Marshillong rang ap kol ka Rangdajied um shim la lah ban kem bha khop ia ka bol,  kaba hangne u Wanlamsuk uba la  don kham hajan u la ioh ban shut ia kane ka bol kaba la rung beit kluk sha lyndet ka kol.

Kumta ha kaba kut jong kane ka jingiakhun, ka Nangkiew Irat kan iai long kum ka kynhun ka bym shym la mad satia ia kane ka nam rem ha kane ka lympung mynta ka samoi, tangba khyndiat kan kham jew mynsiem ba kam lah ban bteng ban khur ia ka nam jop, pynban wat la katta ruh kan iai neh halor duh ka miej iakhien point hadienba kala ioh ba kan khur 10 point na ki saw sien iakhun ba kala dep, katba na ka liang ka Rangdajied, da kane nam iakhaid, joit kan kiew sha ka kyrdan kaba saw hadien ba kan khur 5 point.

Ka jingiakhun ka ban long haka 5 tarik Nailur kan long hadpeng ka Sawmer SC pyrshah ia ka Langsning FC kaban long haka por 4:30 nohphai sngi.