Khang u District Magistrate ban lum pisa beain haka surok sha Kupli Orchid Resort

Syllad | The Rising MeghalayaApril 22, 2025

U District Magistrate ka West Jaintia Hills, u AK Singh, IAS u la pynjari da ka hukum hapoh ki kyndon 163 BNSS kaba khang pyrshah ia ka jinglum pisa beain kum ka bai rung (entry fees) ha ka surok kaba lam shapoh Kupli Orchid Resort, ha ka shnong Priang, West Jaintia Hills.

Ka ophis u District Magistrate ka la ong ba ka la ioh pdiang ia ki jingtip ba ka Dorbar Shnong Puriang ka la lum pisa kum ka bai rung ha ka surok kaba lam shapoh Kupli Orchid Resort kaba dei ka jingdon jingem jong ka sorkar ba la pyniaid da ka Tnad Tourism ka Sorkar Meghalaya.

Da kaba pynshong nongrim halor ka kaiphod na u Block Development Officer, Laskein C&RD Block, ki Sengbhalang bapher bapher, ki riew shimet bad ki trai jaka ki la ong ba ka jingdon jong kane ka jaka lum khajna ha kane ka surok kaba lam sha Kupli Orchid Resort bad ki jaka ba marjan ka la wanrah shibun ki jingeh ia ki paidbah nongleit nongwan kiba hap ban iaid lyngba kane ka surok.

Kumta khnang ban khanglad ia kano kano ka jingeh kaba lah ban nangmih shuh shuh, na ka liang u District Magistrate u la pynjari mardor da kane ka hukum kaba khang pyrshah iaka jinglum pisa beaiñ.

Kane ka hukum kan treikam mardor tad haduh bala pynbna da kumwei.