Khang sbak ka Elaka Nongjngi iaka leit ka wan ki Pnar bad Karbi

Syllad | The Rising MeghalayaJuly 6, 2023

Wat hadien baka dorbar shnong Khanduli kala plie iaka jingkhang ban iakren iasuk bad ki Karbi, bad ka jingpyrshang ki ar tylli ki bor district ka West Jaintia Hills bad West Karbi Anglong ban wanrah iaka jingiasuk ki jaidbynriew pnar bad karbi, pynban kam shym la poi shaei shaei.

Kane kala jia hadien baka Karbi Anglong Autonomous District Council (KAAC) kam khein snep iano iano bad bteng ban pynieng iaka khyrdop lum khajna jong ka ha Khanduli.

Kane ka jingiakynad ki jadbynriew pnar bad Karbi kala sdang naduh 15 tarik Iaiong jong une u snem hadien baka wan sieh ka KAAC ia ka signboard khrong khajna ha Khanduli.

Lah ban pynkynmaw ba ki nongshong shnong ka Khanduli haka 17 tarik Iaiong kila pyni paid ban jynrat ia kane ka signboard. Dei tang hadien katto katne por ka KAAC kala pynieng biang iaka signboard bad kala mih ka jingkhang pyrshah na ki paid Karbi ban leit rep leit riang ki nong Khanduli sha ki jaka rep jong ki kiba don sha Karbi Anglong.

Kumta da ka jingbitar iaka jingleh ki nong Karbi, ka KAAC bad ka ka Sorkar Assam, ka Dorbar jong ka Elaka Nongjngi ka la rai ban khang shisyndon ia ka rung ka mih na ki shnong ne sha ki shnong kiba markhap bad ki shnong Karbi haduh ban da wanphai ka shongsuk shongshngain hapdeng ki nongshong shnong Khanduli bad ki Karbi.

Ia kane ka rai la shim ha ka jingialang bala pynlong kyrkhieh ha shnong Khanduli hapoh Namdong C&RD Block haka 6 tarik Naitung.

Haba iakren bad u syllad hadien katei ka jingialang, u Dolloi jong ka Elaka Nongjngi U Ma Copiousness Daw u la ong ki la ioh ia ka jingtip kaba thikna ba ki Karbi ki dang ioh lad ban khaii pateng bad katto katne ki Pnar wat hapdeng ka jingkhang ha thain Khanduli.

“Kumta ka Dorbar  jong ka Elaka Nongjngi ka la shim ia ka rai ban khang dam ia ka leit ka wan na ki shnong Pnar sha ki shnong Karbi haduh da pynbeit ia ka jingiakynad hapdeng ki nong Khanduli bad ki Karbi,” la ong u Dolloi ka Elaka Nongjngi.

U la ong shuh shuh ba ka Dorbar ka shim ia katei  ka rai khnang ban teh lakam ia kano kano ka jingshim kabu kaba lah ban pynheh shu ia kane ka jingiakynad.

U Ma Daw u la pynpaw ruh ia ka jingpyrshah jong Dorbar jong ka Elaka ia jingwanbuh khyrdop jubor da ka KAAC hapoh u pud u sam jong ka Elaka.