Khang pyrshah ka Panaliar iaka JFEPA ban pynlong ia kino kino ki prokram hapoh u pud u ang shnong

Syllad | The Rising MeghalayaSeptember 21, 2023

Ka Shnong Panaliar Jowai hadien ka aiom slap, ka ju pynkhuid ia ki jaboh jabaiñ ha shilynter ka Wah Myntdu ba hap hapoh u pud u ang jong ka, kyrpang iaka Syntu Ksiar, kawei na ka jaka ba khring iaki nongwan jngohkai.

Ha une u snem ruh, ka Shnong Panaliar ka la sdang ban pynkhuid iaka jaka ba dei ka bynta ka Syntu Ksiar bad ruh kala pynduh iaki katto katne ki jingthoh ba shait buh da ka seng Jaiñtia Fishing and Environmental Protection Association (JFEPA), Jowai, halor ka nongrim ba ka NOC ba la ai ia katei ka seng haki snem mynshuwa ka lah kut.

Nalorkata, ka Shnong Panaliar man ka por ka ju pynkynmaw iaka Jaiñtia Fishing and Environmental Protection Association (JFEPA), Jowai ban pynthymmai iaka NOC hynrei kam patiaw eiei.

U kyrwoh na u Waheh Chnong Panaliar Riquoma Rq Laloo, ula ong ba haka jingiadei bad kane, ka seng JFEPA ka la mudui da ka jingujor ejahar (FIR) iaka shnong bad ka la maham ruh ia ki briew kiba ka Shnong Panaliar ka phah ban pynkhuid ia katei ka jaka.

Ula ong kane kala pynlong iaki nongkitkam bad dkhot shnong bad ka Shnong Panaliar ka la khot ia ka jingialang ba kyrkieh bad la mih ka rai ban pyndam shisyndon ia kino kino ki kam ba ka Jaiñtia Fishing and Environmental Protection Association, Jowai, kiba ka thmu ban pynlong hapoh u pud u sam ka shnong Panaliar.

“Kane kamdei ka rai ba thymmai jong ka shnong, lah don naduh mynshuwa ba, kino kino ki seng ne riew shimet kimlah ban pynlong ia ki kam paidbah khlem da pyntip ne iohbor na ka shnong. Mynta, kyrpang ia katei ka seng, kamlah shuh ban pynlong Fishing Competition ha shilynter ka Wah Myntdu badon hapoh u pud u sam ka shnong, bad lada ka pyrshah ia kane, ka shnong ka lah ban pyntreikam ia ki aiñ shnong jong ka, da kiba kham eh,” la ong u Waheh Chnong Panaliar ma Riquoma.

Kumta, ka shnong ka khot ka wer iaphi baroh kiba pule ia kane ka khubor ban pynbna shuh shuh sha kiwei, khnang ba kin dup tip ia kane ka jingleh donbor bad khlem akor katei ka seng, ki bym sngewthuh bad bymtip ia ki aiñ jong ki shnong bapher bapher ba ki lah buh yha ki shnong jong ki. Ka shnong Panaliar ka khang pyrshah ruh ia ka prokram ka ban pynlong da ka seng Jaiñtia Fishing and Environmental Protection Association, Jowai ba iasnohktilang bad ka Rotary Club Jowai kaban sa long ha ka  24.09.2023 hapoh u pud u sam ka shnong.