Khang pynlong jingiakhih hapoh 200 meter na Secretariat bad Raj Bhavan

Syllad | The Rising MeghalayaJune 13, 2025

Ka District Magistrate ka East Khasi Hills, ka la pynjari mardor da ka kyndon 163 BNSS kaba khang pyrshah ban pynlong ia kino kino ki jingiakhih, jingialang paidbah hapoh ka 200 mitar na Secretariat bad Raj Bhavan.

Ia kane ka hukum la pynmih haka sngi Thohdieng, kata tang khyndiat kynta hadien ba da ki spah ngut ki dkhot jong ka Confederation of Meghalaya Social Organizations (CoMSO) ki la tur kynsan sha Secretariat ban pynlong jingiakhih halor ka jingpynslem jong ka sorkar ban pyntreikam ia ka Inner Line Permit (ILP) hapoh ka Jylla bad ban thaw ia ka kynhun Special iInvestigation Team (SIT) khnang ba yn lap ban pynher krad ia ki nong Bangladesh kiba wan rungtuh sha ka jylla.

Ka hukum ka ong ba la shem ba bun ki sengbhalang ne ki kynhun seng bapher bapher ki ju pynlong ia ka jingiaid paidbah, jingialang paidbah bad ki jingiakhih na ka por sha ka por, bad kiba kum kine ki jingleh lada ailad kan pynthut ia ka leit ka wan jong ki kali bad lam sha ka jingialum paidbah bad wanrah ka jingkhapngiah bad pynthut ia ka leit ka wan bad ka suk ka sain jong ki paidbah.

Kumta la pynjari da ka kyndon 163 BNSS kaba khang pyrshah ia kino kino ki briew ne seng ban pynlong ia kino kino ki jingiakhih, rally hapoh 200 mitar na Secretariat bad Raj Bhavan. Nalor kata la khang pyrshah ruh ban rah ia kino kino ki kynja tiar kiba lah ban pynmynaw briew.

Nalor kata ka hukum ka maham ruh ba kino kino kiba pynkhein ia kane ka hukum kin shah pynngat ha ki kyndon 223 jong ka BNS bad kiwei kiwei ki kyndon kat kiba iahap.