Khang khyrdep ka bor District ia ka khyrdop lum khajna ka KHADC ha Umdihar, Ri Bhoi

Syllad | The Rising MeghalayaMay 17, 2025

Ka bor pyniaid District jong ka Ri Bhoi haka sngi Thohdieng ka la leit ban khang khyrdep ia kawei ka khyrdop lum khajna jong ka Khasi Hills Autonomous District Council (KHADC) ha Umdihar ha ka surok National Highway-6, da kaba kdew ba ka jingpynieng ia kane ka khyrdop ka long kaba beain bad ka bym shym la ioh jingmynjur na ka sorkar.

Ka bor Synshar District ba la synran lang da ki pulit ka la shim ia kane ka sienjam hadien ka jingioh jingtip ba ka KHADC ka la lum pisa T.200 na man ki trok kit mar kiba iaid lyngba kane ka khyrdop.

U Deputy Commissioner ka District u Abhilash Baranwal u la ong, “Kane ka khyrdop lum khajna kaba don ha ka surok NH-6 ka dei kaba la pynieng da ka KHADC. Hynrei, katkum ki kyndon jong ka sorkar ym lah satia ban pynieng khyrdop ha ki surok bah National Highway lane surok PWD ka jylla khlem da ioh ia ka jingbit kaba biang bad ia ka No Objection Certificate (NOC) na ki bor ba dei khmih.”

Kumta ruh u la ong hadien ba ki la ioh pdiang ia ki jingujor bad hadien ki jingmih khubor ki la shim ia ki sienjam ban leit bad khangdam noh ia kane ka khyrdop lum khajna.

Une u heh ka District u la ban jur ruh ba ka jingpynieng ia ki jaka talasi ne ki jaka lum khajna khlem da ioh jingbit ka dei ka jingpynkhein ia ki kyndon jong ka sorkar, bad u la maham ruh ba kin shim ia kane kajuh ka sienjam pyrshah ia kino kino ki jingtei ba khlem ioh jingbit ha ki surok paidbah.