Khang ka Sorkar ban ai wai ia ki kali shimet ban kamai hadien ka jingshah pyniap u tourist na Indore

Syllad | The Rising MeghalayaJune 17, 2025

Ka Sorkar Meghalaya ka la rai ban khang pyrshah ha kaba iadei bad ka jingai wai beain ia ki kali shimet ban kamai, kata kynthup ia ki kali ar shaka bad saw shaka kiba dei jong ki riew shimet ne kynhun ki bym shym la ioh bor.

Ka ophis jong u Commissioner of Transport ka la pynmih ia ka jingpynbna paidbah ha ka 13 tarik Jymmang 2025 ban pynshai ba ka Meghalaya kam pat shym la pynbna ne pyntreikam ia ka skhim ai wai ia ki kali ar shaka ne kali saw shaka Rent-a-Motorcycle or Rent-a-Cab Scheme).

Kumta kino kino ki riew shimet ne kynhun kim lah satia ban ai wai ia ki kali jong ki, kata ki ar shaka ne kali saw shaka sha kino kino ki briew na ka bynta ban kamai ne ban leit shangkai.Kaba kum kane ka jingleh ka long beit beit ka jingpynkhein ia ki kyndon jong ka Motor Vehicles Act, 1988.

Kane ka jingpynbna ka la kylla ruh ruh ka mat iatai kaba jur bha hadien ka jingjia shah pyniap jong u tourist na Indore (Madhya Pradesh) u Raja Raghuvanshi ha la ka jong ka kurim ka Sonam bad ka kynhun runar ha ka thain Sohra, kata kiba la shim wai ruh da ka scooty na Shillong ka bym pat shym la register ha kano kano ka skhim kaba lah ban ai wai.

Ka kyndon 66 ka la kren shai ba la khang pyrshah ban pyndonkam ia kino kino ki kali kum ki kali kamai khlem da don ia ka permit. Kumjuh ka kyndon 192A ka kren shai ba dei ban dain kuna pyrshah ia kiba pyndonkam ia ki kali shimet na ka bynta ban kamai, katba ka kyndon 207 ka ai bor ia ka Tnad Transport bad ki bor pulit ba kin kurup ia ki kali namar ka jingpynkhein ia ki kyndon kiba iadei bad ka permit.

Na ka liang u Commissioner ka Transport u la maham ba kino kino kiba pynkhein ia kine ki kyndon ain kin ngat ha ka jingshah pynsaja kaba tyngeh kynthup ka jingkurup ia ki kali, ka jingdain kuna bad set along.

Na ka liang u Superintendent of Police (Traffic), East Khasi Hills district, u K. Prasad u la pynthikna ba ka Tnad pulit ka la ioh ia ka jingbthah na ka ophis u Commissioner of Transport ban pyntreikam mardor ia kane ka jingpynbna.

Haba kren sha ki lad pathai khubor, u SP Prasad u la ong ba ki la bthah ia baroh ki pulit pyniaid kai hapoh ka District ba kin pynlong ia ki jingtalasi kiba bniah bad lada shem ia kiba pynkhein ain yn leh da kaba tyngeh katkum ka ain.

U pynpaw ruh ka jingkyrmen ba watla mynta ka Tnad ka dang pynleit jingmut tang hapoh East Khasi Hills, hynrei ia kaba kum kane ka sienjam yn pyntreikam ha baroh kawei ka jylla, kata katkum ka jingbthah kaba la wan na u Commissioner of Transport.

Nalor kata u SP u maham ruh ba lada don ia kiba pynkhein ain kin ngat ha ka jingshah pynshitom.U la ong ba ia baroh ki Tnad Traffic hapoh ka District la pyntreikam pura khnang ban peitngor bha ia ka jingshim wai beain ia ki kali shimet kynthup ia ki ar shaka. U la ong ba lada lap ia kito kiba pynbeit ia kiba kum kine ki kali beain khlem da ioh ia ka jingbit kaba biang ne registration kin ngat ha ka jingshah pynshitom.