Khang ka Seiñraij Jowai ia ki iew ban tem ïaka jingpur ka khlam #COVID_19, pynkhreh iaka jaka thang ia kiba iap ha Dulong

Syllad | The Rising MeghalayaMay 12, 2021

Ka Seinraij Jowai kala shim iaka sienjam ban khang shisyndon iaki iew ki hat kiba ka pyniaid ha Iawmusiang Jowai bad ha madan Datlawakor bad kiwei kiwei ha sor Jowai ban iakhun pyrshah bad ban pyndkut ia u kynjri jingpur ka khlam #COVID_19 naduh ka sngi ba Ar.

U President Seinraij u ma OR Shallam ula ong ia kane ka rai ka Seinraij Jowai kala shim hadien ba ka sngewkhia iaka jingpur bad ka jingsar ka khlam COVID haka district bad ka jylla baroh kawei.

Ka jingkhang iaki iew ka Seinraij kala sdang naduh ka sngi ba ar tad haduh bala pynbna da kumwei.

U Ma OR Shallam, ula ïathuh ba ka jingkhang khyrdep kan long naduh na madan Datlawakor (Stand War), madan Siat-thong, madan Chad Sukra (Stand Ummulong), madan Kñia Khat (Stand Shangpung), madan Moosaphir haduh Stand Indica.

Ula ïathuh ba hadien ba ka bor District jong ka West Jaintia ka la weng ïaka jingpynrynkhing ban khang iaki iew ban ïada na ka jingpur u khñiang jingpang COVID-19, la sakhi ba ki nongdie nongthied ki la wan iew wan hat kum u paid bhur ban thied ban pet iaki jingdonkam jong ki khlem da bud ïaki adong adit ban ïada COVID. Ka Seinraij Jowai ka sngewkhia ia kane bad kala kyntu ia kiwei ki nongpyniaid iew na sor Jowai shaduh nongkyngdong ban khang iaki iew ban tem iaka jingialum u paidbah, kaba dei kawei na ki jaka ba ka khlam ka ioh ban pur.

Ha kawei pat ka khubor u OR Shallam ula pyntip ba ka Seinraij Jowai ka pdiang ïa kiba khlad na ka jingpang COVID ban pyndep ïaka jingleh niam khatduh jong ki ha Khnap Thangbru kaba don ha Pohhali, Dulong, Jowai

Ula kyntu ïaki trai ïing ba kin pyntip sha bor district kumjuh ka ophis jong ka Seinraij Jowai khnang ban leh ïa kaba donkam.