Khang ka NHIDCL ia ka surok 7 Mer ba tyllun u mawbah hapdeng surok Umtyngar bad Mylliem

Syllad | The Rising MeghalayaMay 30, 2025

Ka jingtwa khyndew bad ka jingtyllun u mawbah haka sngi Thohdieng ha ka lynti surok hapdeng ka Umtyngar bad Mylliem, East Khasi Hills ka la pynlong ia ka National Highways & Infrastructure Development Corporation Limited (NHIDCL) ba kan hap ban khang noh shwa shipor ia ka surok 7 Mer Upper Shillong ka ban leit sha ka thain Sohra tad haduh ban da dep pynkhuid ia kan ka surok

Ka la pyntip ruh ba kin hap ban pyndonkam da ki tiar pynbthei ban pynpra ia une u mawbah khnang ban lah ban pyllait pat ia kane ka lynti surok kaba la sahkut kumjuh ban pynkhuid ia ka khyndew kaba la twa.

Namar kane ka jingjia, u Additional Deputy Commissioner & CEO ka DDMA u kyntu ia ki nongleit nongwan ba kin pyndonkam shipor ia ka surok Lum Shillong bad mih sha Pomlakrai-Laitlyngkot. 

Iap ka longkmie, mynsaw ki khun na ka jingtwa khyndew, iap u rangbah ba shah rah umsaw ha East Khasi Hills

Na ka liang Sub-Divisional Officer, Pynursla CSD ruh u kyntu jur ia ki nongleit nongwan ba kin kiar ban leit sha ka thain Pynursla lyngba ka surok Shillong- Dawki lada ka kam ka bym donkam than bad ban iaid noh na kiwei pat ki lynti kum na Jowai-Dawki ne na Sohra-Nongjri.

Kane ka jinghap slap kaba khlem sangeh ka la pynshlei um ruh ia ka surok bah National Highway 06 bad NH-27 naduh 12 Mile, 13 Mile, Byrnihat haduh Jorabat ha Ri Bhoi District naduh haka step sngi Thohdieng.

Kane ka jinghap slap ka la pynshlei um ruh ia ki pynthor kba bad ki jaka rep ha kylleng ki jaka.

Ka St. Jude Secondary School, Umpher kaba don ha Byrnihat, Ri Bhoi sa shisien pat ka la shah ktah biang ha ka jingshlei um, kumjuh ruh kiwei pat ki skul, ki hostel bad ki iingmane.