Khang ka KSU iaka toll plaza ha Lumshnong

Syllad | The Rising MeghalayaJuly 28, 2022

Ka Khasi Students’ Union (KSU), East Jaintia Hills District Unit kala khang tala iaka toll plaza ne ka khyrdop lum pisa ka NHAI ha Lumshnong haka sngi Palei.

Ha kane ka jingkhang tala ia kane ka toll plaza la ialam da u president KSU, East Jaintia Hills u Streamly N Suchen, vice president KSU East Jaintia Hills Satly Ryngkhlem, general secretary KSU East Jaintia Hills KS Suchiang nalor ki phew ngut ki dkhot ka KSU.

Ka KSU kala rai khang tala ia kane ka jaka lum pisa ka NHAI hadien ba kala leh kuman iaka jingdawa ban maramot iaka surok bah NH06 kaba la jot rathai naduh na Tuber haduh Malidor.

Ka KSU haka 13 tarik une u bnai kala dep ai dorkhat sha ka bor district lyngba u Additional Deputy Commissioner, East Jaintia Hills ban dawa maramot iaka surok, phewse haduh bala khang tala ym pat don kino kino ki dak ki shin ba ka NHAi kan pyntrei iaka surok, la ong ka KSU.

Da kumta, ka KSU kala shim ia kane ka sienjam ban jyrwait skhor iaka NHAI kaba bteng iaka jinglum pisa, katba ka surok pat kam patiaw ban shna bad lyndet iaka jingshngain u paidbah nongshong kali ba iaid lyngba kane ka surok.

Ka KSU kala dawa ban shna shuwa iaka surok bad hadien bala dep pynbha iaka surok ka lah ban lum iaka pisa.