Khang ka Iawmusiang ban shong die ha lynti ïaid paidbah, yn pynshitom ïaki ba leh pyrshah

Syllad | The Rising MeghalayaMarch 28, 2021

Ka dorbar shnong Tympang Iawmusiang, Jowai kala khang pyrshah ban die jingdie ha lynti iaid kjat paidbah.

U Edystone Shylla Waheh Shnong Dorbar Shnong Tympang Iawmusiang ula ong ba naduh lashai ka sngi 29 tarik la bthah ia baroh ki nongdie jingdie kiba die jingdie ha lynti iaid kjat (footpath) kim bit shuh ban die jingdie ha kine ki lynti ba ka pynthud iaka iaid ka ieng ki paidbah.

“Naduh lashai ka sngi 29.03.2021 ngi la rai ban khang pyrshah ia kane ka jingshong die jingdie ha lynti iaid kjat khnang ban shngain ka iaid ka ieng ki paidbah nongleit nongwan kumjuh ki khynnah skul,” la ong u ma Edystone.

“Kino kino ki nongdie jingdie kiba leh pyrshah yn pynshitom katkum ki aiñ shnong,” la ong shuh shuh ma Edystone bad kyntu iaki nongthied nongpet ba kim bit ban thied jingthied na footpath ban nym pynshlur iaki nongdie madan ban shong ha ki basa iew kiba don hapoh u pud u ang ka shnong.