Khang ka District Magistrate ia ki kali kit skum ban wan rung sha sor Shillong

Syllad | The Rising MeghalayaDecember 21, 2024

Ka District Magistrate, East Khasi Hills District ka la pynjari da ka kyndon 163 ka BNSS kaba khang pyrshah ia ki kali kit skum, kata ki trok, pickup kiba wan na ka surok Mawtawar-Mawsiatkhnam ba kin rung sha sor Shillong.

La pynmih ia kane ka hukum hadien ka jingioh khubor ba kine ki kali kit skum kiba kit palat pud ki buh ka jingma bad ki lah ruh ban tyngkhuh ia ki sainar elektrik bad kaba lah ban lam sha ka jingpluh ding kaba triem.

Nalor kata la ong ruh ba kine ki skum kiba hap nalor ki kali ki la pynjaboh ia ki surok ha ki shnong ki thaw bad kaba la pynpulom ia ka jingthmu jong ka jingpynkhuid ia ki shnong ki thaw.

Kino kino kiba pynkhein ia kane ka hukum kin ngat ha ka jingshah pynshitom katkum ka kyndon 223 ka BNSS, bad kane ka hukum ka la treikam mardor tad haduh ban da pynbna da kumwei pat.