Khang ka District Magistrate ia ki kali kit palat pud ban iaid na ka jingkieng Nongspung-Laitmawsiang

Syllad | The Rising MeghalayaJuly 19, 2025

Ka District Magistrate ka East Khasi Hills District, Shillong ka Kong RM Kurbah haka 19 tarik Naitung ka la pynjari ka ka kyndon 163 BNSS kaba khang pyrshah ia ki kali kiba kit palat 9 ton ba kin iaid lyngba ka jingkieng No. 1/1 ha ka surok Nongspung-Laitmawsiang Road namar ka dang don hapdeng ka jingmaramot.

Ka hukum ka la ong ba kane ka jingkieng ka lah ban kyrshan tang haduh 9 ton, bad ka jingiaid jong ki kali kiba kit palad pud ka la pynlong ia kane ka jingkieng ba kan sniew bad julor bad kaba lah ruh ban nangjulor shuh shuh.

Katba kane ka jingmaramot ia ki bynta jong kane ka jingkieng ka dang iaid shakhmat, ka long kaba donkam ban khanglad na kano kano ka jingpynjulor shuh shuh na ka bynta ka jingshngain jong ki nongleit nongwan bad ki nongshong shnong.

Kumta na ka liang ka District Magistrate ka la pynmih ia kane ka hukum kaba khang pyrshah ia ki kali kiba kit palat 9 ton ban iaid na kane ka jingkieng bad kiba ialeh pyrshah kin ngat ha ka jingshah pynshitom katkum ki kyndon 223 ka BNS lem bad kiwei ki kyndon.

Kane ka hukum kan sdang treikam mardor tad haduh ban da pynbna da kumwei pat.