Khang iaid kali ba kit palat pud ha ka surok PMGSY ha Lakasein bad jingkieng Shymplong

Syllad | The Rising MeghalayaDecember 14, 2022

U District Magistrate East Jaintia Hills District ula khang pyrshah ban iaid ki trok, ki trailer kiba kit palat pud ha ka surok PMGSY ha Lakasein bad haka jingkieng Shymplong haka surok Borghat Sonapur.

U District Magistrate ula pynjari da ka kyndon ain 144 CrPC ban tem iaka jingsniew ka surok Lakasein bad ka jingsniew ka jingkieng ha Shymplong, kaba pyniasoh iaki shnong khappud India Bangladesh.

Ka hukum ka ong ba ka surok PMGSY ha Lakasein (Semasi Umkyrpong haduh Kseh) kala julor namar ka jingiaid sahuh ki trok kiba kit palat pud. Kane ka surok ka dei kaba shna haka dur jong ka surok nongkyndong bad ym shym la design bad iaid ki trok ne kali heh.

Shuh shuh ha kaba iadei bad ka jingkieng Shymplong, ka jingkieng kaba la shah rong haka umsaw ha kane ka aiom lyuir bala dep bad la shna iaka jingkieng thymmai, katba ka jingkit kaba kane ka jingkieng ka lah ban shan ka dei tang 9 Metric Ton katkum ka report PWD (Road) Department.

Kumta lada iaid ki kali kiba kit palat iaka jingkhia bala buh ha kane ka jingkieng ka lah ban wanrah iaka jingjulor ka jingkieng bad kaban pynthud iaka iaid ka ieng ki kali kaban ktah iaka shnong khappud India Bangladesh.

Kane ka hukum u District Magistor kan treikam mardor tad haduh bala pynbna daka kumwei.