Kem ki pulit ka Ri Bhoi ia u pulit Assam ba thmu leh beijot ia ka khynnah rit

Syllad | The Rising MeghalayaAugust 31, 2025

Ki pulit ka Ri Bhoi ha ka 30 tarik Nailar ki la ioh ban kem noh ia uwei u pulit ka Assam uba shah kynnoh donkti ha kaba thmu leh beijot ia kawei ka khynnah rit ha kawei ka shnong kaba hap hapoh ka thain Block II ha Ri Bhoi District ha ka 27 tarik Nailar.

Une u pulit constable Lance Naik/121 ba tip kyrteng kum Projen Langthasa na ka 18th APBN, Lumding uba la shah bat nyngkong ha ki nongshong shnong hadien u la ioh ban phet krad.

Ki pulit ki la register case halor kane ka jingjia ha Nongpoh Women police station hapoh ki kyndon jong ka POCSO Act.

U Superintendent of Police ka District, u Vivekananda S Rathore u pyntip ba ka kynhun ki pulit ka Ri Bhoi ki la hiar sha Lumding, Assam ha ka 29 tarik Nailar bad ioh ban kem noh ia une u pulit ka Assam ha ka  jong ka 30 tarik Nailar mynsngi bad wan kit noh ia u mardor sha Nongpoh.

“Ka jingtohkit mynta ka la iaid shakhmat bad shen yn pyndep noh ia ka chargesheet pyrshah ia une u runar. Ngin shim ia baroh ki sienjam ban pyndep noh kloi ia ka jingtian bishar bad ban pynthikna ia ka hok na ka bynta kane ka lanot,” ong u heh pulit uba la bynrap ruh ba kin pyndep noh khlem da pynslem khnang ban pynioh ia ka song jingiarap katkum ka ain sha kane ka khynnah lyngba ka sorkar jylla.

Na ka liang u SP u la ai ruh ka jingkhublei ia baroh ki ophisar ka sorkar Meghalaya kumjuh ka Assam namar ka jingshimkhia ban iarap lem ha kaba iadei bad kane ka kam.