Kem ki pulit ia uwei bad ki 12 bodyguard hadien ba ioh kurup ia ki suloi air gun

Syllad | The Rising MeghalayaSeptember 6, 2025

Ki pulit ka East Khasi Hills ha ka janmiet jong ka 5 tarik Nailur ki la kem noh ia u Mebanshem Snaitang lem bad ki nongbud jong u halor ka jingkynnoh leh thok kum ki pulit hadien ka jingioh kurup noh ia ki suloi air gun na ki laitylli ki kali remdor kiba la ioh bat noh nakhmat Secretariat ha kane ka juh ka sngi.

Ia u Mebanshen lem bad kine ki nongbud kiba phong da ki riam iong kiba iasyriem bad ki riam ba ju phong da ki pulit Special Operation Team (SOT) la ioh ban bat noh najan Secretariat.

Ki pulit ki la ioh ban kurup noh ia ki santylli ki suloi nitro air gun lem bad ki riam iong nalor ki walkie talkie na ki laitylli ki kali remdor kiba kynthup ia ka Audi, ka Scorpio bad ka Innova Toyota bad kaba la pynmih ruh ka jingsuba ba ki lah ban pyndonkam ha kaba pyntieng pynsmiej ia ki briew.

U SP ka East Khasi Hills, u Bah Vivek Syiem u la ong ba ha ka por kumba 2:30 nohphai sngi ki pulit ki la bat noh ia kawei ka kali Audi A4 rong saw ka bym don ia u registration number, kawei ka Scorpio kaba don ia u nombor (ML 05 AF 0309) bad ka Toyota Innova rong iong kaba don ia u nombor T0922 ML7411A kiba pynieng shabar ka Shoppers Stop, IGP.

U la ong ruh ba baroh kine ki kali ki dei kiba tah iit iong ha kaba kawei na ki ka dei kaba don sairen ia kiba la long trai da u Mebanshem Snaitang uba shong ba sah ha Pohkseh, Shillong. Ha kine ki kali ki don 12 ngut ki shynrang kiba phong da ki riam iong ia kiba la iohi kum ki nongbud jong u Mebanshem.

Haba la pynlong shuh shuh ia ka jingtalasi ki pulit ki la lap ia santylli ki suloi air gun, 2 ki air pistol, 6 ki magazine pouches, 2 ki laptop, 5 ki walkie talkie bad ki number plate AS ia kiba la kurup noh.

“Ki pulit ki la register case halor ka jingleh thok kum ki bor pulit ban leh ia ki kam pyntieng pynsmiej bad hapoh ki kyndon jong ka Arms Act hapoh Sadar Police Station,” ong u SP uba la bynrap ba kin pynlong shuh shuh ia ka jingtohkit ban lap la ki donkti ne em ha kino kino ki kam bymman.

Hashwa ba ki pulit kin rah noh ia ki, u Mebanshem u la pynpaw sha ki lad pathai khubor ba kine ki suloi ba la ioh kurup ki dei ki air gun bad buh jingkylli halor ka jingkurup jong ki pulit da kaba ong, “Kine ki dei ki suloi air gun. Hato ka don ka ain ia ka sorkar Meghalaya ba kan kurup noh ia ki air gun?”